කොලඹ ක්‍රියාකාරී කමිටුව
තුර්කියේ කැන්කායා (Cankaya) මහ නගර සභාවේ වෘත්තීය සමීති නායකත්වය ගෙන යන පාවා දීමට එරෙහිව එහි කම්කරුවන් සිදු කල විරෝධතාවයේ දී සමිති නිලධරය ඔවුන්ට තර්ජනය කරමින් පහර දුන් සිදුවීමක් අගෝස්තු 14දා ලෝක සමාජවාදී වෙබ් අඩවිය වාර්තා කලේය.
මේ පහර දීම සිදු කරනු ලැබ ඇත්තේ, ජීවත් වීමට අපහසු වැටුපකට එකඟ ව පාලකයින් සමග වෘත්තීය සමිති ගැසූ ගිවිසුම කම්කරුවන්ට සැඟවීමට හා කම්කරුවන් හා එකඟ වූ තීරන ගිවිසුමට ඇතුළත් නොකිරීමට සමිති නිලධරය සිදු කල වංචාවන් ප්‍රශ්න කිරීමට වෘත්තීය සමිති කාර්යාලයට ගිය කම්කරුවන්ට ය.
කැන්කායා මහ නගර සභාවේ කම්කරුවන්ට එරෙහිව තුර්කියේ DİSK වෘත්තීය සමිතියට අනුබද්ධ ජෙනෙල්-ඉස්(Genel-İş) වෘත්තීය සංගමයේ නිලධරය නගර සභා පාලකයන්ගේ පොලිස්කාරයන් හැටියට සිදු කල මේ තුච්ඡ ප්‍රහාරය දැඩිව හෙලා දකින ලංකාවේ කොලඹ ක්‍රියාකාරි කමිටුව (කොක්‍රික), ඊට එරෙහිව නැඟී සිටින කම්කරුවන්ට තම සහෝදරාත්මක දෑත දිගු කරයි.
තුර්කියේ ද්‍රෝහි සමිති නිලධරයේ මැර ක්‍රියා, කම්කරු අරගල මැඩීමට ලොව පුරා රාජ්‍ය හා සංගත සමග පෙල ගැසී සමිති නිලධරයන් ගෙන යන කුමන්ත්‍රණවල කොටසකි. ලෝකය පුරා ක්‍රියාත්මක වන මේ ප්‍රතිගාමී ව්‍යාපාරයන්ට එරෙහිව කම්කරුවන්ට සටන් කල හැක්කේ සෑම රටකම වැඩකරන පංතියේ දැනුවත් එකමුතුවකට සටන් වැදීමෙන් ය යන වැටහීමෙන් සිටින කොක්‍රික, ඒ සඳහා ජාත්‍යන්තර කම්කරු පංතියේ සහයෝගය බල මුලුගැන්වීමට පෙරට එන මෙන් වැඩ කරන ජනයාගෙන් ඉල්ලා සිටී.
කොක්‍රික ගොඩ නැගුවේ, හිටපු විධායක ජනාධිපති ගෝටාභය රාජපක්ෂ පලවා හරිමින් නැගී සිටි මහජන ව්‍යාපාරය තුල, ධනේශ්වරයෙන් ස්වාධීන අව්‍යාජ කම්කරු ව්‍යාපාරයක් ගොඩනැගීමේ අරගලයක් හරහාය. එය පදනම් වී ඇත්තේ ධනපති පන්තියේ සියලුම පක්ෂවලින් හා වෘත්තීය සමිතිවාදයෙන් ස්වාධීන ව කම්කරුවන්ගේ බල සංස්ථා ලෙස ක්‍රියාකාරි කමිටු ගොඩ නැගීමට, හතරව ජාත්‍යන්තරයේ ජාත්‍යන්තර කමිටුව (ICFI) කල ඉදිරි දර්ශනාත්මක කැඳවුම මතය.
තුර්කී කම්කරුවන් ආරක්ෂා කිරිමට අප කමිටුව ඉදිරිපත් වන්නේ ලංකාවේ ධනපති පංතියේ ප්‍රහාරයන්ට එරෙහිව වැඩකරන ජනයාගේ සමාජ හා ප්‍රජාතන්ත්‍රවාදී අයිතීන් සඳහා අරගලයක යෙදීමේ අත්දැකීම් ද සහිත සංවිධානයක් හැටියට ය.
කොවිඩ් වසංගතය හා යුක්රේන යුද්ධය මගින් තීව්‍ර වී ඇති තුර්කි පාලක පංතියේ අර්බුදය උද්ධමනය, රැකියා කප්පාදුව හා සුබසාධනයන් උදුරා ගැනීම හැටියට වැඩ කරන ජනයාගේ කර මත පටවමින් සිටී. ඊට එරෙහිව තුර්කිය පුරා දස දහස් ගනන් වැඩ කරන ජනයා විරෝධතා හා වැඩ වර්ජන මගින් ප්‍රතිප්‍රහාරය අරඹා ඇති තතු යටතේ වෘත්තීය සමිති ඇතුලු ධනේශ්වරයේ ආවතේවකරුවන් හා ව්‍යාජ වම්මුන් කම්කරුවන්ට එරෙහි ව කඩා පැනීම සිදු කරනු ලැබ ඇත්තේය.
තුර්කි කම්කරුවන් මෙන් ම ලංකාවේ වැඩ කරන ජනයා ද අත්විඳිමින් සිටින්නේ එකී තතුමය. වර්තමාන රනිල් වික්‍රමසිංහගේ ආන්ඩුවේ කප්පාදු වැඩ පිලිවල සහ ප්‍රජාතන්ත්‍රවාදී අයිතීන්ට එල්ල කරන මෘග ප්‍රහාර දිනපතා උත්සන්න කෙරෙන්නේ ඒවාට එරෙහිව අතක් හෝ එසවීමට ක්‍රියා නොකරන වෘත්තීය සමිතිවල වාරුව ලබමිනි. මේ වසරේ මුල දී ඛනිජ තෙල්, විදුලිය ජල සම්පාදන හා සෞඛ්‍ය සේවා කම්කරුවෝ මිලියන භාගයකට වැඩි සංඛ්‍යාවක් කප්පාදු හා පෞද්ගලීකරණයට එරෙහිව වර්ජන හා විරෝධතා මගින් ප්‍රතිචාර දැක්වුහ. දිනපතා කම්කරුවන් හා ශිෂ්‍යයන්ගේ විරෝධතාවන්ට ආන්ඩුවේ උත්තරය වී ඇත්තේ අධිකරන තහනම් පනවමින් ඒවාට මිලිටරිය යොදා පහර දී විසුරුවා හැරීමයි. වෘත්තීය සමිති ව්‍යාපාරයේ අත්වාරුව ලබමින් මර්දන අන පනත් යොදා ආන්ඩුව ගෙනයන මෘග මර්දනයෙන් පෙන්නුම් කෙරෙන්නේ වැඩකරන ජනයාට ප්‍රජාතන්ත්‍රීය අයිතීන් ලබා දීමට ඔවුන්ගේ කිසිම සූදානමක් නැති බවයි.
තුර්කි වෘත්තීය සමිති නිලධරය මෙන් ම ලංකාවේ වෘත්තීය සමිති ද ආන්ඩුවේ සැලසුම් සමග පෙලගැසී සිටින අයුරු කම්කරුවෝ දිනපතා අත් දකිති. “රටේ වත්මන් තත්ත්වයට ගැලපෙන පරිදි ප්‍රතිව්‍යුහගත කිරීම කල යුතු”යැයි ආන්ඩුවේ පුද්ගලිකරනයට මුහුන දී සිටින ලංකා විදුලි සේවක සංගමයේ නායකයන් විසින් කරනු ලබන ඉල්ලීමෙන් පමනක් නොව කොලඹ වරාය, තෙල් සංස්ථා ඇතුලු පුද්ගලිකරනයට නතු වූ සෑම තැනකම සමිති නිලධරයන් එකාවන්ව එම වැඩ පිළිවෙලට දක්වන සහයෝගයෙන් එය පැහැදිලි ව පෙනී යයි.
ජාත්‍යන්තර පරිමාන අර්බුදයක ගිලී සිටින ධනපති ක්‍රමය විසින් එල්ල කෙරෙන මාරාන්තික ප්‍රහාරවලට කම්කරු පන්තිය මුහුනට මුහුන දී සිටින තතු යටතේ, එකී ප්‍රහාරයට එරෙහිව කම්කරු පන්තිය මෙහෙයවීමට වෘත්තීය සමිති ව්‍යාපාරයට නොහැකි ය. නිෂ්පාදනය සාපේක්ෂ ලෙස ජාතික සීමාවන් තුල පැවැති යුගයක කම්කරු පන්තියට ප්‍රතිසංස්කරන දිනා දීමේ අරගල මෙහෙයවමින්, ධනපති පන්තිය හා කම්කරු පන්තිය අතර හෙට්ටු කරන්නන් ලෙස කටයුතු කරමින්, එමඟින් පන්ති අරගලයේ සමථකරුවන් ලෙස සේවය කල ලෝ පුරා වෘත්තීය සමිති ව්‍යාපාර, නිෂ්පාදනයේ ගෝලීයකරනයත් සමඟ සම්පූර්න අර්බුදයක් කරා ගමන් කර ඇත. වර්තමාන ලෝක පරිමාන ධනේශ්වර අර්බුදයට ප්‍රතිචාර ලෙස ධනපති පන්තිය විසින් කම්කරු පන්තිය මත හෙලනු ලබන ප්‍රහාරවලට මුහුන දීමේ මොනම හෝ ජාතික වැඩ පිළිවෙලක් නොපැවතීම නිසා, කම්කරු පන්තියට ‘සහන’ දිනා දෙන්නන් ලෙස පැවැති භූමිකාව වෛෂයික ව අහෝසි වී ගොස් ඇති තතු යටතේ, දැන් වෘත්තීය සමිති කෙලින්ම වැඩකරන්නේ ධනපති පාලනයේ ආරක්ෂක බල ඇනියක් ලෙසයි. මෙසේ ගෝලීය අර්බුදයකින් ගිලී සිටින ධනපති ක්‍රමය සිය පැවැත්ම සඳහා දරන මාරාන්තික ප්‍රයත්නයේ දී ඔවුන්ගේ සහකරුවා ලෙස කම්කරු පංතියට එරෙහි ව ඕනෑම දුරක් යෑමට සමිතිවල ඇති සූදානම ලොව පුරා අත්දැකීම් මගින් තහවුරු වෙයි. තුර්කියේ ඉහත සිදුවීමේ දී වෘත්තීය සමිති කම්කරු හිමිකම් වෙනුවෙන් පෙනී නොසිටීම ගැන ප්‍රශ්න කරන්නට කාර්යාලයට පැමිනි කම්කරුවන්ට එරෙහිව කායික ප්‍රහාර එල්ල කිරීමට ක්‍රියා කිරීම පසුපසින් පවතින යථාර්තය වන්නේ එයයි.
තුර්කියේ මෙන් ම සෑම රටකම ද කම්කරුවන්ට රැකියා, වැටුප් ඇතුලු අයිතීන් රැක ගැනීමේ මාවත වැටී ඇත්තේ ධනපති ක්‍රමයටත්, එහි ආරක්ෂකයා වන වෘත්තීය සමිතිවලටත් එරෙහි අරගලය හරහා බව වටහා ගෙන සිටින කොක්‍රික, වෘත්තීය සමිති හා මධ්‍යම පංතික ව්‍යාපාර ධනපති රාජ්‍යය හා සංගත සමග පෙල ගැසී ගෙනයන ප්‍රතිගාමී ව්‍යාපාරය හෙලිදරව් කරමින්, කම්කරු පන්තික ප්‍රජාතන්ත්‍රවාදය ක්‍රියාත්මක වන කම්කරු පන්තියේ ස්වාධීන සංවිධාන ගොඩ නැඟීම තීරනාත්මක කාරනයක් බවට පත්ව ඇතැයි යන්න පිලි ගනී. කම්කරු පීඩිත ජනයාගේ ආර්ථික, දේශපාලන හා ජීවන අවශ්‍යතා නියෝජනය කරන, ඔවුන්ගේ ප්‍රජාතන්ත්‍රවාදී අභිමතය මත ක්‍රියාත්මක වන එකී සංවිධාන තුල, කම්කරුවන් ධනපති පන්තියට හා එහි රාජ්‍යයට ගැට ගසමින් ධනේශ්වර අර්බුදයේ බර කම්කරු පන්තියේ කර මත පටවන වෘත්තීය සමිති නිලධරයන් ඇතුලු ධනපති ඒජන්තයන්ට මොනම ඉඩක්වත් නැත. පාවාදීම් කපා හරිමින් අරගලය අවසාන ජයග්‍රහනයක් දක්වා ගෙන යාමට නම්, සාකච්ඡා හරහා ප්‍රජාතන්ත්‍රවාදී ලෙස තීන්දුවලට එළඹෙන කම්කරු පන්තියේ එවැනි ස්වාධීන, අව්‍යාජ ප්‍රජාතන්ත්‍රවාදී සංවිධාන අත්‍යවශ්‍ය ය.
කම්කරු පන්තියේ ස්වාධීන ක්‍රියාකාරී කමිටු ගොඩනැඟීම ද, ලෝකය පුරා එවැනි ක්‍රියාකාරී කමිටුවල ජාත්‍යන්තර සන්ධානයක් පිහිටුවීම මඟින් කම්කරු පන්තියේ වෛෂයික එකමුතුව තහවුරු කිරීම ද සඳහා ලෝසවෙඅ හරහා හජාජාක නිකුත් කර ඇති කැඳවීමට කොක්‍රික සිය සහයෝගය පල කරයි. මෙම වැඩ පිලිවෙල ඉදිරිපත් කරමින් මෑත කාලයේදීම සසප ක්‍රියාකාරීන් සිදු කල මැදිහත්වීම් ගනනාවක දී ම වෘත්තීය සමිතිවල මැදිහත් වීමෙන් ඔවුන්ට කායික අඩම්තේට්ටම් සහ වාචික තර්ජන ද, බාධා කිරීම් ද සිදුකෙරුනි. කොක්‍රික එම ප්‍රහාර වලට එරෙහිව සසප හා ස්වාධීන කම්කරුවන් ආරක්ෂා කලේය.
කොක්‍රක තුර්කි කම්කරුවන්ගෙන් මෙන් ම ලංකාවේ ද, ලොව පුරා ද කම්කරුවන්ගෙන් ද ඉල්ලා සිටින්නේ සමාගම් හා ආන්ඩු සමග කම්කරු පොලීසියක් ලෙස ක්‍රියාත්මක වන වෘත්තීය සමිතිවලින් ස්වාධීනව තමන්ගේම දේශපාලන බල සංස්ථා ගොඩනගා ගනිමින්, ඒවා ජාතිකවත්, ජාත්‍යන්තරවත් එකමුතු කරමින්, කටයුතු තම පාලනය යටතට ගැනීම සඳහා වන අරගලය හා අත්වැල් බැඳ ගන්නා ලෙසය. නිදහස උදෙසා ඒ හැර අන් මාවතක් කම්කරු පංතියට නැත.
තුර්කි කම්කරුවනි, ස්වාධීන ක්‍රියාකාරී කමිටු ගොඩ නගනු!
ලංකාවේ කම්කරුවන්ගේ හා දුගීන්ගේ ප්‍රජාතන්ත්‍රවාදී හා සමාජවාදී සම්මේලනය ගොඩනගමු!
කමිකරු ක්‍රියාකාරී කමිටුවල ජාත්‍යන්තර සංධානයක් සඳහා පෙරට!
