Author name: theSocialist.LK

ක්ලාරා වෙයිස් විසිනි.

මෙහි පලවන්නේ ලෝක සමාජවාදී වෙබ් අඩවියේ 2023 අප්‍රේල් 26 දින පල වූ ක්ලාරා වෙයිස් සහෝදරිය විසින් ලියන ලද “80 years since the Warsaw Ghetto Uprising” යන ලිපියේ සිංහල පරිවර්තනය යි. කොටස් දෙකකින් පලකරනු ලැබෙන මෙම ලිපිය පරිවර්තනය කලේ මිගාර මල්වත්ත විසිනි.

අප්‍රේල් 19, 1943 වෝර්සෝ ගෙටො හි [නාසින් අල්ලාගත් කලාපවල යුදෙව්වන්ට වෙන් කල ප්‍රදේශ] නැගිටීමෙහි ආරම්භය සිදු විය. පසුගිය බදාදා,  එහි 80 වැනි සංවත්සරය සනිටුහන් කළේය. මෙම නැගිටීම මහාද්වීපයේ ( යුරෝපයේ) නාසි පාලනයට එරෙහිව මහා පරිමාණ නාගරික සන්නද්ධ ප්‍රතිරෝධයේ පළමු ක්‍රියාව විය.

දුර්වල ලෙස සන්නද්ධ සටන්කාමීන් සිය ගණනක් – ඔවුන්ගෙන් බොහෝ දෙනෙක් ඔවුන්ගේ නව යොවුන් වියේ හෝ විසි ගණන්වල මුල් භාගයේ පසු වූ අය වූ අතර – සති කිහිපයක් නාසීන්ගේ කුරිරු එස්එස් හමුදාවන්ට එරෙහි වීමට සමත් වූහ.  මෙම නැගිටීම මෙහෙයවනු ලැබුවේ සමාජවාදී සියොන්වාදී හෂෝමර් හට්සායර්, වාම පෝලන්ත සියොන්වාදීන් සහ යුදෙව් කම්කරු බුන්ඩ් ඇතුළු කොමියුනිස්ට් තරුනයන්ගේ සහ යුදෙව් සමාජවාදී පක්ෂවල සන්ධානයක් විසිනි. ඒ සියල්ලෝම දැඩි ලෙස සෝවියට් ගැති වූ අතර යුදෙව් විරෝධී හා ෆැසිස්ට්වාදයට එරෙහි සටන නොබිඳිය හැකි ලෙස ධනවාදයට එරෙහි සටන බව ඒත්තු ගෙන සිටියහ.    නාසීන්ට කැරැල්ල මැඩපැවැත්වීමට හැකි වූයේ ගෙටොව ගිනිබත් කර, 13,000 ක් පමණ මිනිසුන් මරා දැමීමෙන් පමණි. ඔවුන්ගෙන් අඩක් පමණ පණපිටින් පුළුස්සා හෝ ගින්න මගින් ඇතිවන දුමාරයෙන් හුස්ම හිර කර මරා දැමුණි.

සමූලඝාතනයේ (හොලොකොස්ටයේ) ගමන් මග නැවැත්වීමට හෝ වෙනස් කිරීමට එයට නොහැකි වුවද, නැගිටීම මගින් නාසි ආක්‍රමණිකයන්ගේ පදනම දෙදරුමට ලක් විය. එය සිදු වූයේ, ස්ටාලින්ග්‍රෑඩ්හිදී රතු හමුදාව විසින් නාසි ජර්මනිය පරාජය කිරීමෙන් යන්තම් මාස දෙකකට වැඩි කාලයකට පසුවය. එහිදී ( ස්ටැලින්ග්‍රාඩ්) මුළු ජර්මානු හමුදාවක්ම අතුගා දමා තිබුණි.  මෙම නැගිටීම නිසා සමකාලීනයන් අතර වෝර්සෝ ගෙටොව “කුඩා ස්ටාලින්ග්‍රෑඩ්” යන පදය උපයා ගත්තේය.  රතු හමුදාවේ දැන් ආරම්භක ප්‍රගතිය සමග, එය යුරෝපය පුරා නාසි තන්ත‍්‍රයට සහ එහි සහචරයින්ට එරෙහිව සමාජ හා විප්ලවවාදී අරගල පුපුරා යාම හඟවන ලදී.  එය ( වෝර්සෝ ගටො නැගිටීම) එතැන් සිට නාසි නායකත්වය යුරෝපීය යුදෙව්වන් මිලියන 6 ක ජන සංහාරය කිරීමේ ඉතිහාසයේ හොඳම ප්‍රචලිත කථාංගයක් බවට පත් වූ අතර ෆැසිස්ට්වාදයේ අතිමහත් සන්නද්ධ බලය හමුවේ ධෛර්ය සම්පන්න විරෝධයේ සංකේතයක් බවට පත්ව ඇත.

එහි දැවැන්ත ඓතිහාසික හා දේශපාලන වැදගත්කම තිබියදීත් – එසේත් නැතිනම් ඒ නිසා – 80 වැනි සංවත්සරයේ සැමරුම් අතිශයින් නිහඬය.  ජර්මනියේ ජනාධිපති ෆ්‍රෑන්ක්-වෝල්ටර් ස්ටේන්මියර්,  වෝර්සෝහිදී වූ සිදුවීම ගැන “සමාව” ඉල්ලා සිටිමින්  වාචාල කතා ගණනාවක් ප්‍රකාශ කරන  අතරම ජර්මන් ආණ්ඩුව යුක්‍රේනය තුළ දී රුසියාවට එරෙහිව යුද්ධයක් සඳහා යුද ටැංකි යවමින් සිටී. ඉතිහාසය මුසාකරනය කිරීමේ කේන්ද්‍රීය භූමිකාවක් ඉටුකරමින් සිටින පෝලන්ත ආණ්ඩුව යුදෙව් විරෝධීවාදය ප්‍රවර්ධනය කිරීමට සහ රුසියාවට එරෙහිව නේටෝ යුද්ධය ඉදිරියට ගෙන යාම සඳහා දායකත්වය සපයයි.

ජර්මනිය තුලම, ඉතා සුළු අනුස්මරණ පැවති අතර, ඒවා සියල්ලම පාහේ යුදෙව් ප්‍රජාවන් විසින් සංවිධානය කරන ලදී.  කැපී පෙනෙන විශේෂිත දෙයක් වූයේ ලයිප්සිග්හි සයිමන් ඩබ්නොව් ආයතනය විසින් සංවිධානය කරන ලද තෙදින ශාස්ත්‍රීය සම්මන්ත්‍රණය වන අතර, පෝලන්ත යුදෙව් ඉතිහාස ක්ෂේත්‍රය පලිබද  ප්‍රමුඛ පෙළේ ඉතිහාසඥයින් බොහෝ දෙනෙකුගෙන් එහි සිටි අතර නැගිටීම පිළිබඳ මෑත කාලීන ඓතිහාසික සොයාගැනීම් පිලිබඳව හා එයට සම්බන්ධ වූ විවිධ දේශපාලන ප්‍රවණතා ද සමාලෝචනය කරන ලදී.  .

සම්මන්ත්‍රණයේ සන්දර්භය තුළ, ලයිප්සිග් විශ්ව විද්‍යාලයේ සිසුන් නාසිවාදය විසින් හිංසාවට ලක් වූ, මරා දැමූ හෝ පිටුවහල් කරන ලද නිර්මාපකයින්ගේ කෘති පිළිබඳව ක්‍රියාකාරී ප්‍රසංගයක් ද සංවිධානය කළහ.  නාසීන් විසින් විනාශ කරන ලද සංගීත සංස්කෘතියේ පුලුල් විවිධත්වය සහ පොහොසත්කම ප්‍රකාශ කිරීමට පමණක් නොව, මෙම නිර්මාපකයින් පීඩාවට පත් වීමට පෙර ඔවුන් ජීවත් වූ ජීවිත පිළිබඳ හැඟීමක් ලබා දීම සඳහා සිසුන් විසින්ම සංගීත ඛණ්ඩ තෝරාගෙන තිබුණි.  1920 ගණන්වල බර්ලිනයේ සංගීත ජීවිතයේ ප්‍රධාන කාර්යභාරයක් ඉටු කළ සහ පසුව එක්සත් ජනපදයට සංක්‍රමණය වීමට බල කෙරුනු, පෝලන්ත-යුදෙව් නිර්මාපකයෙකු වන ඉග්නාට්ස් වැගල්ටර්ගේ, පලමු පියවරයන් තුනෙහි මුල්ම කෘතිවලින් එකක් වන ඩී මේජර් හි ස්ට්‍රිං ක්වාර්ටේට් හි පළමු පියවර  විශේෂයෙන් කැපී පෙනේ.  නාසීන් විසින් ඝාතනය කරන ලද චෙක්-යුදෙව් නිර්මාපකයෙකු වන අර්වින් ෂුල්හෝෆ්ගේ “අයිරනීස්” හි අත් හතරක් සඳහා කෙටි නමුත් නව්‍ය පියානෝ ඛණ්ඩ තුනක් ද සිදු වාදනය කරන  ලදී.

සිසුන් මහත් උනන්දුවෙන් සංගීත ඛණ්ඩ වාදනය කළ අතර එක් සිසුවෙකු එක් එක් නිර්මාපකයෙකු හා වාදනය කල සෑම නිර්මාන කොටසක් පිලිබඳව  බැරෑරුම් හැඳින්වීමක් ඉදිරිපත් කළේය.  සංගීත භාණ්ඩ සඳහා වූ ලීප්සිග් කෞතුකාගාරයේ පැවති මෙම ප්‍රසංගය කෙතරම් උනන්දුවක් දැක්වුයේද යත්, ප්‍රේක්ෂකයන්ට අසුන් ගැනීමට අමතර පුටු ගෙන ඒමට ද සිදු විය.

හොලෝකොස්ටයේ  පවතින බුද්ධිමය හා සංස්කෘතික බලපෑම  ග්‍රහණය කර ගැනීමට තරුනයන් හා කම්කරුවන් අතර ඇති පැහැදිලි පෙළඹවීම සමඟම ඓතිහාසික සත්‍යය යටපත් කිරීමට හා විකෘති කිරීමට සහ සිදු වූ දෙය හෑල්ලු කිරීමට හෝ සිදු වූ දේ අනුස්මරණය නොකිරීමට ආන්ඩු දරන උත්සාහයන් අතර කැපී පෙනෙන වෙනසක් ඇත. නිශ්චිතවම, එය සැමරීමට ධනේශ්වර ආන්ඩුවලට උනන්දුවක් නැත්තේ වෝර්සෝ ගෙටො නැගිටීමේ ඓතිහාසික පාඩම් වල සමකාලීන දේශපාලන අදාළත්වය නිසාය.

එහෙත් ලෝකයේ නව අධිරාජ්‍යවාදී යලි බෙදීමක දිග හැරෙන සුළි කුණාටුවට, ෆැසිස්ට් බලවේග ගොඩනැගීමට, සමාජ ප්‍රතිවිප්ලවයට සහ දැනට පවතින වසංගත හා දේශගුණික ව්‍යසනයට අද මුහුන දී සිටින කම්කරුවන්ට, වෝර්සෝ ගෙටො සමූලඝාතනය( හොලෝකොස්ටය) නැගිටීම සහ නම් වීරෝදාර එනමුත් ඛේදනීය අත්දැකීමෙන් ඉගෙන ගැනීමට ඉමහත් පාඩම්  රැසක් ඇත.  

වෝර්සෝ ගෙටෝ නැගිටීමේ මූලයෝ

සති හයක් වැනි කෙටි කාලයක් තුළ, එනම් 1942 ජූලි 22-සැප්තැම්බර් 8 වැනි දින අතර සිදු වූ, ඇස්තමේන්තුගත පරිදි, ගේටොවෙන් පිටුවහල් කරන ලද   යුදෙව්වන් 265,000ක් ,  ට්‍රෙබ්ලින්කා මරණ කඳවුරට ගෙන ආ  විගස ගෑස් යොදා ඝාතනය කිරීම, එනම් “මහා ක්‍රියාවේ” දී ලැබූ විනාශකාරී අත්දැකීම ගෙටොවේ සන්නද්ධ ප්‍රතිරෝධය සඳහා වූ සැලසුම්වල ක්ෂනික මූලාරම්භය විය. නැගෙනහිර යුරෝපය පුරා ගේටො හා ගාල් කඳවුරු මුර කිරීමට නාසීන් විසින් පුහුණු කරන ලද යුක්රේනියානු කුලී හේවායන් වන ඊනියා “ට්‍රව්නිකි” හමුදාව, යුදෙව්වන් ක්‍රමානුකූලව වටකර ගැනීමේ දී සහ ට්‍රෙබ්ලින්කා වෙත ප්‍රවාහනය කිරීමේදී සැලකිය යුතු කාර්යභාරයක් ඉටු කළහ.

“මහා පිටුවහල් කිරීම” (Great Deportation) යනු ඊනියා ” රයින්හාඩ් මෙහෙයුම” (Aktion Reinhard) හි කොටසකි, එය නාසි-ආක්‍රමණය කරන ලද පෝලන්තයේ මහා ආණ්ඩුවේ ගෙටෝවල ජීවත් වූ මිලියන 2ක සමස්ත යුදෙව් ජනගහනය ක්‍රමානුකූලව කාර්මික ඝාතනය කිරීම සඳහා වූ කේත නාමයයි.  රයින්හාඩ් ක්‍රියාකාරකම්  1942 ජනවාරි මාසයේ කුප්‍රකට වන්සී ( Wannsee) සමුළුවෙන් සති කිහිපයකට පසු, එනම්, 1942 මාර්තුවේ දී ආරම්භ කරන ලදී. මෙම සමුළුුවේදී ප්‍රමුඛ නාසි සහ ජර්මානු රාජ්‍ය නිලධාරීහු යුරෝපයේ සියලුම යුදෙව්වන් කාර්මිකව විනාශය කිරීමට එකඟ විය.  1942 මාර්තු සහ 1943 මාර්තු අතර වසරක කාලය තුළ, හොලෝකෝස්ටයට ගොදුරු වූ මිලියන 6 න් අඩකට වඩා ඝාතනය කරන ලදී.  යුදෙව්වන් මිලියන 1.47ක් ගෑස් යොදා ඝාතනය කරන ලද,1942 අගෝස්තු සහ නොවැම්බර් අතර මාස තුන තුළ, කාර්මිකකරන ලද ඝාතන එහි උච්චතම අවස්ථාවට ළඟා විය – සමූලඝාතනයට ගොදුරු වූ මුළු සංඛ්‍යාවෙන් හතරෙන් එකක් සහ ඉතිහාසයේ මෙතෙක් වාර්තා වූ ඉහළම ඒක පුද්ගල ඝාතන අනුපාතය විය.

වින්දිතයන් අතර වෝර්සෝහි යුදෙව් ප්‍රජාවේ බහුතරය විය.  යුද්ධයට පෙර, වෝර්සෝ යනු 400,000 ජනතාවක්, එනම් නගරයේ මුළු ජනගහනයෙන් තුනෙන් එකක් සමන්විත වූ ලොව විශාලතම යුදෙව් ප්‍රජාවගේ නිවහන විය.  1940 නොවැම්බරයේ පිහිටුවන ලද මෙම ගෙටොව, නාසින් වාඩිලාගෙන සිටි යුරෝපයේ තිබූ එවැනි ආකාරයේ විශාලතම එක වූ අතර යෝධ රැදවුම් කඳවුරක් ලෙස ක්‍රියාකාරී ලෙස ක්‍රියාත්මක විය.  වෝර්සෝ හි ඊනියා “ආර්ය කලාපය” තාප්පයක් මගින් ගෙටෝවෙන් වෙන් කළ අතර, ගෙටෝව පැවැති කාලය පුරාම වෙළඳාම සහ ජාවාරම් දෙකලාපය අතර දිගටම පැවතුනි.  එහි වැසියන්ට දිනකට කැලරි 184ක පමණ සාගිනි සලාකයක් ලබා ගැනීමට සිදු විය.  කුසගින්න, ටයිෆස් උණ  සහ වෙනත් රෝගවලින් පීඩා විදීම නිසා, මහා පිටුවහල් කිරීමට පෙර ගෙටෝ වැසියන්ගෙන් හතරෙන් එකක් පමණ මිය ගියහ.

නාසීන් විසින් ඇති කරනු ලැබූ  බිහිසුණු ජීවන තත්වයන් සහ දිගටම පැවති භීෂණය තිබියදී, පෝලන්ත යුදෙව්වන්ගේ පොහොසත් බුද්ධිමය හා සංස්කෘතික සම්ප්‍රදායන් පිළිබිඹු කරමින් ගෙටෝව විශිෂ්ට සංස්කෘතික හා දේශපාලන වැඩබිමක් බවට පත් විය.

ශ්‍රේෂ්ඨතම දේශපාලනික සහ සංස්කෘතික වැදගත්කමක් දැරූයේ ඔයනෙග් ෂබ්ෂ් (Oyneg Shabbes) ලේඛනාගාරය ආරම්භ කර පවත්වාගෙන ගිය සමාජවාදී සියොන්වාදී ඉතිහාසඥයෙකු වන එමානුවෙල් රිංගල්බ්ලම්  (Emanuel Ringelblum) විසින් සිදු කරන ලද ප්‍රතිපදානයයි. නාසිවාදය විසින් 1940 සිට ගෙටොව දියකර හැරීම දක්වා ඔයනෙග් ෂබ්ෂ් (Oyneg Shabbes ) විසින් පෝලන්ත යුදෙව්වන් අඛණ්ඩව විනාශ කිරීම ගැන පමණක් නොව, ගෙටොවේ එදිනෙදා ජීවිතය සහ සංස්කෘතික හා දේශපාලන ක්‍රියාකාරකම් පිළිබඳවද විශාල තොරතුරු රාශියක් රැස් කරන ලදී.

ලේඛනාගාරය, විශේෂයෙන්ම, පෝලන්ත යුදෙව්වන්ට සහ ගෙටො ජීවිතයට මාක්ස්වාදයේ සහ සමාජවාදයේ දැවැන්ත බලපෑම පෙන්නුම් කරයි. එම බලපෑම හැදෑරිමෙන් තොරව නැගිටීමේ දේශපාලන මූලාරම්භය තේරුම් ගත නොහැක. ගෙටොවේ වඩාත් ක්‍රියාකාරී දේශපාලන ප්‍රවනතා අතර සමාජවාදී සියොන්වාදී බාලදක්ෂ ව්‍යාපාරය වන හෂෝමර් හට්සර්  (Hashomer Hatzair) සහ රිංගලබ්ලම්  සම්බන්ධ වූ වාම  පෝලන්ත සියෝන්වාදීන්  මෙන්ම කොමියුනිස්ට්වාදීන් ද විය. අන්තර් යුද්ධ පෝලන්තයේ බොහෝ දුරට කලා ශිල්පී යුදෙව් ජනතාව අතර සැලකිය යුතු බලපෑමක් ඇති කළ සහ දශක කිහිපයක් තිස්සේ සංවිධිත සංහාරවලට එරෙහිව යුදෙව් ප්‍රජාවන් තුළ ආත්මාරක්ෂක ඒකක පිහිටුවීමට මූලිකත්වය ගෙන සිටි යුදෙව් සමාජ ප්‍රජාතන්ත්‍රවාදී කම්කරු බුන්ඩ් පක්ෂය ද ප්‍රමුඛ කාර්යභාරයක් ඉටු කළේය. මෙම ප්‍රවනතාවන් සියල්ලම [1943] නැගිටීමට සම නායකත්වය දෙනු ලැබීය.

මහා පිටුවහල් කිරීම දක්වාම පාහේ ට්‍රොට්ස්කිවාදී ව්‍යාපාරය වෝර්සෝ ගෙටො හි දේශපාලනිකව ක්‍රියාකාරීව සිටි බව රිංගල්බ්ලම්ගේ ලේඛනාගාරය පෙන්නුම් කරන අතර සමහර මූලාශ්‍ර පෙන්වා දෙන්නේ ට්‍රොට්ස්කිවාදීන් නැගිටීමට සම්බන්ධ වූ බවයි. [1]

1940 සහ 1941 අතර ට්‍රොට්ස්කිවාදීන් පෝලන්ත භාෂා සඟරා දෙකක් වෝර්සෝ ගෙටො හි ප්‍රකාශයට පත් කළහ. එනම් “රතු බැනරය” (Czerwony Sztandar) සහ න්‍යායාත්මක සඟරාව “මාක්ස්වාදී සමාලෝචන” (Pregłąd Marksistowski ) යි. ඒවා ගෙටොවේ  තාප්පයේ දෙපැත්තටම බෙදා හරින ලදී.  ඔවුන්ගේ ප්‍රකාශනවල ලියොන් ට්‍රොට්ස්කි විසින් රචනා කරන  ලද ලිපි පලවූ අතර, 1941 අගෝස්තුවේ නිකුත් කරන ලද ඔහුගේ ඝාතනයේ පළමු සංවත්සරය වෙනුවෙන් කැප කරන ලද පත්‍රිකාවක් ද, ඔක්තෝබර් විප්ලවයේ  සහ පැරිස් කොමියුනයේ පාඩම් සහ විප්ලවවාදී මාක්ස්වාදය සහ ස්ටැලින්වාදය අතර වෙනස ආදිය සහ සමකාලීන හා ඓතිහාසික සිදුවීම්වල න්‍යායික හා දේශපාලන විශ්ලේෂණ ද ඇතුළත් විය. පෝලන්ත ට්‍රොට්ස්කිවාදී  නායකයා සහ “පෝලන්ත ට්‍රොට්ස්කිවාදයේ පියා” වන සොලමන් එර්ලිච් (1907-1942) පිටමං කරනු ලැබූ අතර 1942 ගිම්හානයේදී ට්‍රෙබ්ලින්කාහි ගෑස් කුටියක් තුළ දී ඝාතනය කෙරුණි. [2]

පෝලන්ත ට්‍රොට්ස්කිවාදීන්ගේ අවසන් සංරක්‍ෂිත ප්‍රකාශනය 1942 මැයි 1 දින පලවූ මැයි දින පත්‍රිකාවකි. පෝලන්තයේ සියලුම ජාතීන්ට අයත් කම්කරුවන්ට ආයාචනයක් ලෙස ලියා ඇති එය, යුරෝපයේ වාඩිලාගත් නාසීන්ට එරෙහිව සංවිධානාත්මක, සන්නද්ධ ප්‍රතිරෝධයක් සඳහා වූ බලගතු කැඳවීමකි. එය ධනවාදයට එරෙහි අරගලයේ දී යුරෝපයේ කම්කරු පන්තියේ ජාත්‍යන්තර එකමුතුව සඳහා සහ යුරෝපය පුරා හතරවන ජාත්‍යන්තරය ගොඩනැගීම සඳහා කැඳවුම් කලේය.  විශේෂයෙන්ම පෝලන්ත, යුදෙව් හා ජර්මානු කම්කරුවන්ගේ එකමුතුවේ අවශ්‍යතාවය ට්‍රොට්ස්කිවාදීන් අවධාරනය කලේ ය:

ජර්මානු කම්කරු පන්තිය සිය හදවතේ ගැඹුරින් සමාජවාදයේ පරමාදර්ශවලට සැබෑව රැඳී සිටින අතර අප සමඟ එක්ව හිට්ලර්වාදය සහ ධනවාදය තුරන් කිරීමට උත්සාහ කරයි.  මැයි දිනයේදී, අපි අපගේ ජර්මානු කම්කරු පංතියේ සහෝදරවරුන්ට අපගේ සහෝදරාමක හස්තය දිගු කරමු, අපි ලොව පුරා සිටින කම්කරුවන්ට අපගේ දෑත් දිගු කරමු, ඔවුන් සමඟ එක්ව අපගේ පොදු සතුරාට එරෙහිව සම්පූර්ණ හා අනුකම්පා විරහිත පළිගැනීමක් කරන්නෙමු. [3]

යුදෙව් සංස්කෘතික ජාතිකවාදය සැලකිය යුතු කාර්යභාරයක් ඉටු කළ සමාජවාදී ප්‍රවනතාවන් අතර පවා, යුදෙව්වන්ගේ ඉරනම, සියල්ලටම වඩා යුරෝපයේ ජනතාවගේ උපකාරය සහ සමාජ විප්ලවයේ වර්ධනය මත රඳා පවතින බවට අවබෝධයක් තිබුණි.  විශේෂයෙන්ම 1942 වසන්තයේ දී යුරෝපයේ විප්ලවයක් සිදු විය හැකි බවට බලාපොරොත්තු ඉහළ ගියේය. රිංගලබ්ලම් මෙන් වාම පෝලන්ත සියෝන්වාදීන්ගේ සහ ඔයනෙග් ෂබ්ෂ් (Oyneg Shabbes) ලේඛනාගාරයේ සාමාජිකයෙකු වූ ඒබ්‍රහම් ලෙවින් (Abraham Lewin), 1942 මැයි 16 වන දින ඔහුගේ දිනපොතේ මෙසේ සටහන් කර ඇත:

මරණය, විනාශය, ව්‍යසනය, මරණ-වේදනාව යන වචන නළලේ ලියා ඇති නාසි යුගාවසාන විනාශයේ තිරිසන් දර්ශනය වන අගාධය අප සෑම කෙනෙකුටම සමීප වෙමින් පවතී.  අසීමිත අනාරක්ෂිත බවක්, කිසිදා නොනවතින බියක්, අපගේ සියලු ඛේදජනක හා කටුක අත්දැකීම්වල භයානකම පැතිකඩයි … සත්‍යය නම් වර්තමානයේ ජීවිතයත් මරණයත් අතර අරගලයක් පවතින රුසියානු භූමියේ සිදුවන සිදුවීම් සමඟ අපගේ හදවත් කාලයත් සමග  ස්පන්දනය වේ.  මෙම භූමිය තුල, මිනිසා සහ තිරිසනුන් අතර ද, දුක්ඛිත සහ ලේ වැගිරෙන මනුෂ්‍ය වර්ගයා සඳහා වඩා හොඳ හෙටක් පිළිබඳ බලාපොරොත්තුව සහ ලොව මෙතෙක් දැක ඇති වඩාත්ම ලේ පිපාසිත නීරෝගේ ජයග්‍රහණය පිළිබඳ බිය අතර ද ජීවිතය හා මරණය පිලිබඳ අරගලයක් සිදුවෙමින් පවතී.  [4]

ලෙවින් සහ අනෙකුත් අය ෆැසිස්ට්-පාලක ඉතාලියේ නොසන්සුන්තාව පිළිබඳ පුවත් සහ, විශේෂයෙන් ජර්මනියෙන් අලුතින් පැමිණි පිටුවහල් කරනු ලැබූවන් විසින් ගෙන එන ලද  ආර්ථික අර්බුදයේ ලක්ෂණ සහ ජර්මන් රයිකයේ (Reich) [තුන්වන රයිකය යනු1933 සහ 1945 අතර ජර්මනියේ නාසි පාලනය යි] දේශපාලන නොසන්සුන්තාවයන් ගැන වාර්තා දැන ගැනීමට උනන්දුවෙන් කටයුතු කළහ.  මහා පිටුවහල් කිරීම ආරම්භ වීමට සති හයකට පෙර, 1942 ජූනි 3 වන දින, ලෙවින් මෙසේ සඳහන් කළේය:

ජර්මනිය, ඔස්ට්‍රියාව සහ චෙකොස්ලොවැකියාව යන රටවලින් පැමිණෙන ලිපි සමස්ත ජර්මන් රයිකය  පුරා යම් විප්ලවීය පැසවීමක් පෙන්නුම් කරයි.  නිදසුනක් වශයෙන්, බර්ලිනයේ සිට පහත සඳහන් අන්තර්ගතය සහිත ප්‍රකාශන වීදියේ අලවා ඇති බව අපට අසන්නට ලැබුණි: “අපි සාමය ඉල්ලා සිටිමු, අපි අපේ ස්වාමිපුරුෂයන් සහ පුතුන් නැවත කැඳවන ලෙස බලකර සිටිමු”.  චෙකොස්ලෝවැකියාවේ ලිපිවල ද මෙම දැඩි විප්ලවීය ස්වභාවය ඇත.  … මෙම සියලු ලිපි ස්පන්දනය වන්නේ මෙම ලෝක ව්‍යාප්ත ඝාතනයට ඉක්මන් අවසානයක් පිළිබඳ විශ්වාසය සමඟිනි.  මුළු පීඩිත යුරෝපයම වරදවා වටහා ගැනීමකට ලක්ව පැවතිය හැකිද?  හදවත ඉතා ගැඹුරින් ආශා කරන්නේ ගැළවීමයි.  අපි මේ සිහිනය සමඟ නිදාගන්නෙමු;  අපි මේ සිහිනෙන් අවදි වන්නෙමු.  ලෝකවාසීන්ගෙන් සියයට 95කගේ ආදරණීය බලාපොරොත්තු ඉටු නොවී, පිරිහුණු සහ ම්ලේච්ඡ මිනීමරුවන්ගේ නපුරු බලවේගය ජයගත හැකිද?  හේතුව සහ හදවත අපට පවසන්නේ, හිට්ලර්ගේ සහ මුසෝලිනිගේ භූමියේ වන සතුන් නොව සෝවියට් රුසියාවේ, එංගලන්තයේ සහ ඇමරිකාවේ මිනිසුන් තුළ මූර්තිමත් වූ මානව වර්ගයා පිළිබඳ ජයග්‍රහනය සාක්ෂාත් වනු ඇති  බවයි. [5]

මහා පිටුවහල් කිරීමේ දී ලෙවින්ට ඔහුගේ බිරිඳ සහ දියණිය අහිමි විය.  ඔහුද 1943 මුල් භාගයේදී ඝාතනය කරන ලදී. ගෙටොවේ මහා පිටුවහල් කිරීමෙන් දිවි ගලවා ගත් සෑම කෙනෙකුටම ඔහුගේ හෝ ඇයගේ පවුලේ වැඩි කොටසක් අහිමි විය.  දිවි ගලවා ගත් අය, සාමාන්‍යයෙන්, කම්කරුවන් ලෙස “ප්‍රයෝජනවත්” ලෙස සලකනු ලැබූ තරුණ අය වූ අතර, එබැවින් පිටුවහල් කිරීම්වලින් තාවකාලිකව නිදහස් කරන ලදී.

ඉතිරිය දෙවන කොටසින්.

1] ලුඩ්වික් හාස්, 1945 දක්වා පෝලන්තයේ ට්‍රොට්ස්කිවාදය. URL: https://www.marxists.org/archive/hass/1992/xx/tinpoland.html

 [2]Warsaw Ghetto හි ට්‍රොට්ස්කිවාදීන්ගේ ප්‍රකාශන Archiwum Ringelbluma, Tom 21, Prasa Getta Warszawskiego: Radykalna lewica niesyjonistyczna, opracowali: Piotr Laskowski, Sebastian Matuszewski, Warszawa 2016. මෙම වෙලුම අන්තර්ජාලය ඔස්සේ ප්‍රකාශනය කර ඇත:  https://cbj.jhi.pl/documents/940239/19/ 

 [3] Ulotka “1 Maja 1942” in: Ibid., p.  279. මෙම කතුවරයාගේ පරිවර්තනය.

 [4] Abraham Lewin, A Cup of Tears: A Diary of the Warsaw Ghetto, සංස්කරණය කර පරිවර්තනය කළේ Antony Polonsky, Blackwell Publishers, 1988, pp. 73, 74.

 [5] Ibid., පි.  115.

#theSocialistLK #WSWS 

මෙහි පලවන්නේ ලෝක සමාජවාදී වෙබ් අඩවියේ 2023 අප්‍රේල් 21 දින කම්කරු අරගල තීරුවේ Workers Struggles: Asia, Australia and New Zealand සිරසින් යුතුව වාර්තා කරන ලද පන්ති අරගල අතරින් තෝරාගත් වාර්තා කිහිපයකි. පරිවර්තනය SF විසිනි.

ලෝක සමාජවාදී වෙබ් අඩවිය මෙම නිත්‍ය විශේෂාංගයට දායක වන ලෙස කම්කරුවන්ට සහ අනෙකුත් පාඨකයන්ට ආරාධනා කරයි.

ආසියාව:

ඉන්දියාව:  හර්යානා හි බ්ලින්කිට් (Blinkit) සමාගමේ සිල්ලර බඩු බෙදා හැරීමේ ගිග් (Uber වැනි) සේවකයින්ගේ වැඩ වර්ජනය දෙවන සතියට.

බ්ලින්කිට් සිල්ලර බඩු බෙදාහැරීමේ වේදිකාවේ හි ගිග් කම්කරුවන්  දහස් ගණනක් අප්‍රේල් 12 සිට දිල්ලි-NCR (දිල්ලියය සහ අවට) සහ අසල්වැසි නගරයක් වන ගුර්ගෝන්  (Gurgaon) හි වැඩ වර්ජනයක නිරතව සිටිති. සේවකයින්ගෙන් සියයට 10 ක් පමණක් වැඩ කරන අතර බ්ලින්කිට් අඳුරු වෙළඳසැල් (dark stores- ඔන්ලයින් ඇනවුම් බෙදාහැරීම සඳහා වූ ගබඩා) 200 කට ආසන්න ප්‍රමාණයක් වසා දමා ඇත. වැඩවර්ජනය බිඳ දැමීමේ උත්සාහයක් ලෙස වෙනත් පරිගනක යෙදැවුම් මත (app-based )  පදනම් වූ වේදිකාවක් වන රෙපිඩෝ (Repido) වෙතින් කම්කරුවන් භාවිතා කරන බවට වර්ජකයෝ බ්ලින්කිට් සමාගමට චෝදනා කළහ.

ඔවුන් වැඩ වර්ජන ක්‍රියාව ඇරඹුවේ  දැඩි ලෙස වැටුප් අඩු කරන බ්ලින්කිට් හි නව වැටුප් ව්‍යුහයට ප්‍රතිචාරයක් වශයෙනි. කම්කරුවන් පැවසුවේ ඔවුන්ට මීට පෙර එක් බෙදාහැරීමකට රුපියල් 25 ($ US 0.3) සහ රුපියල් 50 අතර මුදලක් ගෙවා ඇති බවයි. දැන් ඔවුන්ට බෙදාහැරීමක් සඳහා රුපියල් 7 සිට 18 දක්වා ගෙවීමක්ද, ප්‍රසාද දීමනා වශයෙන්  බෙදාහැරීම් 100ක් සඳහා රුපියල් 500ක් සහ බෙදාහැරීම්  1000 කට රුපියල් 1000ක් පමණක්  ගෙවනු ලැබේ. බොහෝ බ්ලින්කිට් ගබඩා අතරින් එකකින් සිල්ලර බඩු ලබා ගන්නා බෙදා හැරීම් සේවකයන් විනාඩි දහයක් තුල තම බෙදා හැරීම සම්පූර්න කරතැයි අපේක්ෂා කෙරේ..

පෙර පැවති වැටුප් ක්‍රමය ප්‍රතිෂ්ඨාපනය කිරීම මෙන්ම, වලංගු වාහන නැවැත්වීමේ ස්ථානයක්, වාඩි වීමට ඉඩක් සහ වැසිකිළි, පානීය ජලය ඇතුළු මූලික පහසුකම් කම්කරුවන් ඉල්ලා සිටී. ඔවුන්ගේ ගැටළු විසඳීමට අප්‍රේල් 15 වැනිදා කම්කරු කොමිසම සමඟ පැවති සාකච්ඡාව අසාර්ථක විය.

අඩු වැටුප් සහ ඒ හා සමාන දරාගත නොහැකි සේවා කොන්දේසි වලට එරෙහිව විරෝධය පාමින් සිට ඇති ඕලා  (Ola), ඌබර් (Uber) සහ ස්විගී (Swiggy) වැනි අනෙකුත් වේදිකාවන්හි  ගිග් සේවකයින් සමඟ සංවිධානය වීමට වර්ජකයින් තර්ජනය කර ඇත.

බ්ලින්කිට් ඉන්දියාවේ නගර 30කට වැඩි ගණනක ක්‍රියාත්මක වේ. 2022 ජුනි මාසයේදී බහු ජාතික ආහාර බෙදා හැරීමේ සමාගමක් වන සොමාටෝ ( Zomato) නිවේදනය කලේ, තමන් ඩොලර් මිලියන 568 කට බ්ලින්කිට් අත්පත් කර ගත් බවයි..

බටහිර බෙංගාලයේ නගර සභා කම්කරුවෝ නොගෙවූ වැටුප් ඉල්ලා වර්ජනය කරති

බටහිර බෙංගාලයේ දුර්ගාපූර් නාගරික සංස්ථාවේ කොන්ත්‍රාත් පිරිසිදු කිරීමේ කම්කරුවන් 1,700 කට ආසන්න පිරිසක් අප්‍රේල් 15 වන දින වැඩ නවතා, කල් ඉකුත් වූ වැටුප් ඉල්ලා සංස්ථාවේ ප්‍රධාන ගේට්ටුවෙන් පිටත විරෝධතා දැක්වූහ. වර්ජනය හේතුවෙන් නගරයේ කසළ එකතු කිරීම සිදු නොවීය.

සාමාන්‍යයෙන් මාසයේ මුල් සතියේ වැටුප් ලබන සේවකයන්ට තවමත් වැටුප් ලැබී නැත. පුද්ගලික කොන්ත්‍රාත්කරුවෙකු විසින් සේවයේ යොදවා ඇති මේ කම්කරුවන්ට වැටුප් නොගෙවීම සම්බන්ධයෙන් මාර්තු මාසයේදී ද එවැනිම විරෝධතාවක් පැවැත්වීමට සිදුවිය. සමහරුන්ට මාස තුනකින් වැටුප් ලැබී නැත.  කම්කරුවන්ට අවශ්‍ය වන්නේ ඔවුන්ගේ වැටුප් නියමිත වේලාවට ගෙවීම සහ රජය විසින් නියම කර ඇති අවම වැටුප ගෙවීම ය.

ඕස්ට්‍රේලියාව:

නිව් සවුත් වේල්ස් හි එයාර්බස් පැසිෆික් ගුවන් යානා නඩත්තු සේවකයින් බැහැර කර අගුලු (locked out) දමා ඇත

සති හතක ආරක්‍ෂිත කාර්මික ක්‍රියාමාර්ගයෙන් පසුව, සිඩ්නි නගරයට බටහිරින් රිච්මන්ඩ්හි රාජකීය ඔස්ට්‍රේලියානු ගුවන් හමුදා (RAAF)   ගුවන් කඳවුරේ ගුවන් යානා නඩත්තු සේවකයෝ  80ක් පමණ, වැටුප් ආරවුලක් හේතුවෙන්, සිය  සේවායෝජකයා විසින් සඳුදා පැය දෙකක කාලයක් බැහැර කරනු ලැබ  අගුලු  දමන ලදහ. කම්කරුවන් මාර්තු මුලදී කාර්මික ක්‍රියාමාර්ග ආරම්භ කළ අතර, අතිකාල වැඩ තහනම් කිරීම (වර්ජනය කිරීම), අකුරට වැඩ කිරීම සහ මාර්තු 24 දින වැඩ වර්ජනය මීට  ඇතුළත් විය.

අධ්‍යාපන වෘත්තීය සමිතිය බටහිර ඕස්ට්‍රේලියාවේ කර්ටින් විශ්ව විද්‍යාලයේ තවත් සංකේත වැඩ වර්ජනයක් කැඳවයි.

බටහිර ඕස්ට්‍රේලියාවේ පර්ත් හි කර්ටින් විශ්ව විද්‍යාලයේ අධ්‍යයන කාර්ය මණ්ඩලය ආවරණය කරන ජාතික තෘතීයික අධ්‍යාපන සංගමය (NTEU) විසින්, කළමනාකාරිත්වයේ යෝජිත ව්‍යවසාය ගිවිසුම සම්බන්ධයෙන් ඔවුන්ගේ දිගුකාලීන ආරවුල මත, සිය සාමාජිකයින් සඳුදා පැය දෙකක වැඩ වර්ජනයක් සඳහා කැඳවන ලදී. මාර්තු 13දා සිදුකළ පැය තුනක වැඩ වර්ජනය කළමනාකාරීත්වයේ මුල් වැටුප් යෝජනාවට එතරම් බලපෑමක් කළේ නැත.

නොවැම්බර් මාසයේදී NTEU සාමාජිකයින් 700 කට අධික සංඛ්‍යාවක් කාර්මික ක්‍රියාමාර්ග ගැනීමට පක්ෂව ඡන්දය ප්‍රකාශ කළේ, කොන්දේසිවල සැබෑ දියුණුවක් නොමැති නිසා සහ ඔවුන්ට, 2022 දෙසැම්බර් කාර්තුවේ පර්ත්හි උද්ධමන අනුපාතය වන සියයට 8.3 ට වඩා බෙහෙවින් අඩු සියයට 2.2 ක වාර්ෂික වැටුප් වැඩි කිරීම් පමණක් වසර පහක් තුළ ලබා දුන් නිසාය. පසුගිය වසරේ විශ්ව විද්‍යාලය ඩොලර් මිලියන 113 ක අතිරික්තයක් ලබාගත් නමුත් NTEU ඉල්ලා සිටින්නේ සියයට 5 ක වාර්ෂික වැඩිවීමක්  පමණි; මෙය සැබෑ වැටුප් කප්පාදුවකි.

ශාස්ත්‍රාලීන්ට අවශ්‍ය වන්නේ, විශේෂයෙන් අනියම් කාර්ය මණ්ඩලය සඳහා, අධික වැඩ ප්‍රමාණය කපා හැරීම සහ  වැඩි රැකියා සුරක්ෂිතභාවයකි. එන්ටීඊයූ පවසන්නේ තමන් කලින් ගිවිසුම්වලින් අතහැර දැමූ අනියම් 5,800 සඳහා දැනට පවතින තනතුරු සහ රැකියා සුරක්ෂිතභාවය අවශ්‍ය බවයි.

දැනට සමහර දෙපාර්තමේන්තුවල ඉගැන්වීම්වලින් සියයට 70ත් 80ත් අතර ප්‍රමාණයක් අනියම් අය විසින් සිදු කරනු ලැබේ. ඔවුන්ට අසනීප නිවාඩු සඳහා ප්‍රවේශයක් නොමැති අතර වර්ෂාර්ධයන් (සෙමෙස්ටර්) අතර වැටුප් ගෙවනු නොලැබේ. බොහෝ දෙනෙකුට  පැයකට වැටුපක් වෙනුවට පැවරුම් අනුව ගෙවනු ලැබේ. මේ සැකැස්ම අනුව ඔවුන්ට වාර්ෂිකව ඩොලර් දහස් ගණනක වැටුප් අහිමි වේ.

සාමාජිකයින්ගෙන් සියයට 94ක් පැය 24ක් දක්වා වැඩ වර්ජන ක්‍රියාමාර්ග ගැනීමට ඡන්දය ප්‍රකාශ කර තිබුණද, NTEU කැඳවා ඇත්තේ අවම බාධා ඇති කෙරෙන, නමුත් කම්කරුවන්ගේ කෝපය විසුරුවා හැරීමට යොදා ගන්නා කෙටි කාලීන වැඩවර්ජන පමණි.

පර්ත් නගරයේ  ක්ලීනවේ (Cleanaway) කසළ එකතු කරන සේවකයෝ වර්ජනය කරති

සමාගමේ යෝජිත ව්‍යවසාය ගිවිසුම (enterprise agreement) සම්බන්ධයෙන් ඇති වූ ආරවුලකදී පර්ත්හි තදාසන්න ප්‍රදේශ හතකින් ක්ලීනවේ කසළ එකතු කරන්නෝ  බදාදා පැය 24 ක් සේවා ස්ථානයෙන් ඉවත් වූහ (walked off). එය වසර විස්සකට පසු ඔවුන්ගේ පළමු වැඩවර්ජනය වන අතර ක්වීන්ස්ලන්ඩ්, නිව් සවුත් වේල්ස් සහ කැන්බරාහි ක්ලීනවේ කම්කරුවන්ගේ  කාර්මික ක්‍රියාමාර්ගවලට සමගාමීව සිදුවෙමින් පවතී.

මෙල්බර්න් ගුවන් තොටුපළේ ගුවන් යානා ඉන්ධන පිරවුම් කරුවන් වැටුප් වැඩිවීමක් ඉල්ලා යළි වර්ජනයක

මෙල්බන් ගුවන්තොටුපල-ටලමරීන් (Melbourne Airport-Tullamarine) හි කොන්ත්‍රාත්කරුවෙකු වන රිවට් එනර්ජි ඒවියේෂන් ( Rivet Energy Aviation) ආයතනයේ සේවය කරන  ගුවන් යානා ඉන්ධන පිරවුම් කරුවන් 40 කට අධික සංඛ්‍යාවක් නව ව්‍යවසාය ගිවිසුමක වැඩි දියුණු කළ වැටුප් සහ වඩා හොඳ කොන්දේසි ඉල්ලා බදාදා සවස 5 ට පැය 24 ක කාලයකට සේවා ස්ථානයෙන් ඉවත් වූහ. ඔවුන්ගේ ප්‍රවාහන සේවක සංගමය (Transport Workers Union-TWU), අඟහරුවාදා සවස රිවට් ආයතනය සමඟ  “අර්බුද” සාකච්ඡාවලට එළඹියද ඒවා එකඟතාවයකින් තොර විය.

නවසීලන්තය: 

ගැඹුරු වන සෞඛ්‍ය අර්බුදය පිළිබඳව නවසීලන්ත හෙදියෝ විරෝධය පළ කරති

කාර්ය මණ්ඩල හිඟයට විසඳුම් ලබා දෙන ලෙස දේශපාලන පක්ෂවලින් ඉල්ලා සිටිමින් පසුගිය සෙනසුරාදා නවසීලන්තයේ ස්ථාන 20 ක හෙදියන් සහ අනෙකුත් සෞඛ්‍ය සේවකයින් දහස් ගණනක් සහභාගී වූ විරෝධතා සහ රැලි පැවැත්විණි. NZ හෙද සංවිධානය (NZNO) එහි සාමාජිකයින් 57,000 න් ඉල්ලා සිටියේ අනාරක්ෂිත කාර්ය මණ්ඩල මට්ටම්වලට සහ ඔවුන්ගේ කාර්යය “අඩු තක්සේරුවට” එරෙහිව එක්සත් වන ලෙසයි.

NZNO ප්‍රධාන විධායක පෝල් ගුල්ටර් එලඹෙන මැතිවරනයේදී හෙද හිඟය විසඳීම උදෙසා වන ප්‍රතිපත්ති සඳහා දේශපාලනඥයන් වෙත ආයාචනා කළේය. “දශක ගනනාවක දුර්වල සැලසුම්, ප්‍රමාණවත් අරමුදල් නොමැතිකම සහ අනුප්‍රාප්තික ආන්ඩු මගින් සම්පූර්ණයෙන් නොසලකා හැරීම විසින්, හෙද ක්ෂේත්‍රය පුරා වැටුප්, කාර්ය මණ්ඩල සම්පත් සහ චිත්ත ධෛර්යය සම්බන්ධයෙන් සම්පූර්ණ අර්බුදකාරී  කාලයකට අපව ගෙන යනු ලැබ ඇත,” ඔහු ප්‍රකාශ කළේය. හෙද හෙදියන් 5,000 ක් පමණ හොඳ වැටුප් අපේක්ෂාවෙන් ඔස්ට්‍රේලියාවට ගොස් ඇත.

හෙදියන්ගේ වැටුප් හා සේවා කොන්දේසි පහත හෙලීමට NZNO ව අනුප්‍රාප්තික ආන්ඩු සමඟ වසර ගනනාවක් සහයෝගයෙන් ක්‍රියා කල අතර, වැඩ වර්ජන ක්‍රියාමාර්ග නැවැත්වීම සහ උද්ධමනයට පහලින් වැටුප් වැඩි කිරීම් පැනවීම ද ඊට ඇතුලු විය. කිසිදු කාර්මික ක්‍රියාවකින් තොර වූ පසුගිය සතියේ විරෝධතාවයන්, ගැඹුරු වන සෞඛ්‍ය සේවා අර්බුදය මධ්‍යයේ එහි පීඩනය මුදා හැරීමේ නරුම ව්‍යායාමයකි.

වෙලින්ටන් රාත්‍රී සමාජශාලා නර්තන ශිල්පීහු සූරාකෑමේ කොන්දේසිවලට විරෝධය පල කරති

කර්මාන්තය තුළ පැතිරී ඇති සූරාකෑමේ සහ අපචාරාත්මක තත්ත්වයන් සම්බන්ධයෙන් වෙලින්ටන් රාත්‍රී සමාජශාලා නර්තන ශිල්පීන් පිරිසක් පසුගිය ඉරිදා පාර්ලිමේන්තුවෙන් පිටත විරෝධතාවක නිරත වූහ. වඩා හොඳ ගිවිසුම් සඳහා සාමූහිකව කේවල් කිරීමට උත්සාහ කිරීමෙන් පසු, මෙම වසර මුලදී කැලැන්ඩර් බාලිකා සමාජය විසින් නර්තන ශිල්පීන් සේවයෙන් පහ කරන ලදී.

ජායාරූපය අනුග්‍රහය: The Hindu

#theSocialistLK #WSWS

 ඔස්කාර් ග්‍රෙන්ෆෙල් විසිනි

මෙහි පලවන්නේ ලෝක සමාජවාදී වෙබ් අඩවියේ 2023 අප්‍රේල් මස 27 දින Australian military buildup backs US plans for war with China සිරසින් යුතුව පලවූ ඔස්කාර් ග්‍රෙන්ෆෙල් සහෝදරයා විසින් ලියන ලද ඉදිරිදර්ශන ලිපියේ සංහල පරිවර්තනයයි. පරිවර්තනය මිගාර මල්වත්ත විසිනි.

ඕස්ටේ‍්‍රලියාවේ මිලිටරි ගොඩ නැගීම පෙන්නුම් කරන්නේ, ධනවාදයේ බිඳවැටීම සහ ඇමරිකානු අධිරාජ්‍යවාදයේ පිපිරුම මගින් මෙහෙයවනු ලබන එලඹෙන ලෝක යුද්ධයක සුළි කුණාටුවකට ලෝක ගෝලයේ සෑම කලාපයක්ම ඇදගෙන යන බවයි.

මෙම සතියේ නිකුත් කරන ලද ආරක්ෂක උපායමාර්ගික සමාලෝචනයක් (DSR) දෙවන ලෝක යුද්ධය අවසන් වීමෙන් පසු ඕස්ට්‍රේලියාවේ විශාලතම මිලිටරි ගොඩ නැගීම ගෙනහැර දක්වයි.

එහි කතුවරුන් සහ සමාලෝචනය ආරම්භ කළ ලේබර් ආන්ඩුව, ගුවන් හමුදාව, නාවික හමුදාව සහ මිලිටරි හමුදාව ඇතුළුව “සියලු ක්ෂේත්‍ර වල වැඩි දියුණු කළ දිගු දුර ප්‍රහාරක හැකියාවක්” රට වේගයෙන් අත්පත් කර ගත යුතු බව ප්‍රකාශ කර ඇත.  ඒ, ඉන්දු-පැසිෆික් කලාපය දැන් “ප්‍රධාන ගැටුමක අපේක්ෂාව” මතු කරන “ප්‍රධාන බල මූලෝපායික තරඟයේ” වේදිකාව බවට පත්ව ඇති බැවිනි.

මෙම ලියවිල්ල චීනයට එරෙහි එක්සත් ජනපදය විසින් මෙහෙයවන ආක්‍රමණශීලී යුද්ධයකට සහභාගී වීමට ඕස්ට්‍රේලියාව සූදානම් බව ප්‍රකාශ කිරීමකට වඩා අඩු දෙයක් නොවේ.  “වඩා හොඳ අනාගතයක්” යන සටන් පාඨය මත වසරකට අඩු කාලයකට පෙර තේරී පත් වූ කම්කරු ආන්ඩුවක් විසින් මෙම වැඩපිලිවෙල මහජනතාවගේ පිටුපසින් ඉදිරියට ගෙන ගොස් ඇත.  යුද සැලැස්ම සඳහා ජනවරමක් නොමැති අතර, වැඩකරන ජනතාව අතර පුලුල්ව පැතිරුනු යුද විරෝධී මනෝභාවයක් පවතී.

ඕස්ට්‍රේලියානු මිලිටරි ගොඩනැගීම ජාත්‍යන්තර ප්‍රපංචයක  කොටසකි.  1930 ගනන්වල සිට , දැන් ධනවාදයේ ගැඹුරුම අර්බුදය මධ්‍යයේ, සියලු අධිරාජ්‍යවාදී බලවතුන් නැවත මිලිටරිකරණය වෙමින් සිටිති.  ජර්මනිය නැවතත් යුක්රේනය තුල රුසියාවට එරෙහිව ප්‍රහාරක මෙහෙයුම් සිදු කරයි.  ජපානය සිය මිලිටරි අයවැය දෙගුණ කර ඇත.  ප‍්‍රංශය සහ බ්‍රිතාන්‍ය ඔවුන්ගේ අධිරාජ්‍ය අභිලාෂයන් යලි පණගන්වමින් සිටිති.

භූගෝලීය වශයෙන් හුදකලා රටක් වන ඔස්ට්‍රේලියාව ද මෙම ක්‍රියාවලියට සම්බන්ධ වෙමින් සිටින බව පෙන්නුම් කරන්නේ මිලිටරිවාදයේ පුපුරා යාමේ ගෝලීය ස්වභාවයයි.

ඉහත සඳහන් ඕස්ට්‍රේලියානු සමාලෝචනය හුදකලාව පවත්වනු ලැබුවේ නැත.  එය බයිඩන් පරිපාලනය සහ එක්සත් ජනපද රාජ්‍යය සමඟ සමීපතම සහයෝගීතාවයෙන් ක්‍රියාත්මක විය.

එක්සත් ජනපදය යුක්රේනය බලල් අතක් ලෙස යොදාගෙන එතුල රුසියාවට එරෙහිව ගෙන යන යුද්ධය අඛණ්ඩව තීව්‍ර කරයි.  ඩොලර් බිලියන 100කට වැඩි ආධාර සැපයීම සහ යුක්රේනයටම විශේෂ බලකායන් සහ අනෙකුත් පිරිස් යෙදවීම මෙයට ඇතුලත් කර ඇත.  දැන්, එක්සත් ජනපදය සහ එහි සහචරයින් යුක්රේනය නේටෝව තුලට ඇතුලත් කර ගැනීම සඳහා තල්ලුව සපයයි. එය රුසියාව සමග සෘජු යුද්ධයක් අවුලුවාලිය හැකි පියවරකි.

එහෙත් න්‍යෂ්ටික ව්‍යසනයකට තුඩු දිය හැකි මෙම ප්‍රතිපත්ති නැගෙනහිර යුරෝපයේ ඔවුන් අනුගමනය කරමින් සිටින විට පවා, ඇමරිකානු අධිරාජ්‍යවාදය සහ එහි සහචරයෝ ගෝලීය යුද්ධයක් ලෙස වර්ධනය වෙමින් පවතින දෙයෙහි නව පෙරමුනක් විවෘත කරති.

එක්සත් ජනපදය විසින් ඉන්දියාව, ජපානය, දකුනු කොරියාව සහ ඕස්ට්‍රේලියාව මෙන්ම කලාපයේ කුඩා රටවල් ද කේන්ද්‍රගතව සම්බන්ධ කරගනිමින් ආක්‍රමණශීලී මිලිටරි සන්ධාන ජාලයක් වර්ධනය කිරීම ඇතුලුව, චීනයට එරෙහිව පූර්ණ ප්‍රහාරක සැලැස්මක් ක්‍රියාත්මක කරයි.  මේ අතර, එක්සත් ජනපදය, තායිවානය සම්බන්ධයෙන් දශක ගනනාවක් තිස්සේ පවතින තත්ත්වයට වල කැපීම ද ඇතුලුව, උණුසුම් යුද්ධයකට තුඩු දිය හැකි ප්‍රකෝපකරනයන් හිතාමතාම අවුස්සමින් සිටී.

මෙහිදී‍, ඕස්ට්රේලියාව විශේෂයෙන් කේන්ද්‍රීය කාර්යභාරයක් ඉටු කිරීමට යොදවා ඇත.  එනම්, ඉන්දු-පැසිෆික් කලාපයේ ඇමරිකානු අධිරාජ්‍යවාදයේ වඩාත්ම විශ්වාසදායක සගයා ලෙස, එය වොෂින්ටනයේ පිලිවෙතට ගැට ගැසීමට අනෙකුත් රටවලට තරවටු කිරීම සහ හිරිහැර කිරීම ය.  ඕස්ට්‍රේලියාවේ විදේශ අමාත්‍ය පෙනි වොං වසරකට අඩු කාලයකදී සෑම පැසිෆික් දූපත් රාජ්‍යයකටම සහ බොහෝ අග්නිදිග ආසියාතික රටවල සංචාරය කරමින් මෙම පිලිවෙත ඔස්සේ වෙහෙස මහන්සි වී වැඩ කර ඇත; එහිදී ඇය කිසිදු අපගමනයක් නොඉවසන  බව පැහැදිලි කර ඇත.

හිටපු ට්‍රම්ප් නාවික හමුදා ලේකම් රිචඩ් ස්පෙන්සර්ගේ වචනවලින් කිවහොත්, මිලිටරිමය වශයෙන් ඕස්ට්‍රේලියාව “හෙල්ලයේ තුඩ” විය යුතුය.  එනම්, එය කලාපය තුල නිර්දය ලෙස මිලිටරි ගොඩ නැගීම සඳහා වේගය සැකසීමයි. එහි තර්කය නම් චීනය සම්පුර්ණයෙන්ම මිලිටරිමය ලෙස වටලෑමයි.

එමෙන්ම එය එ.ජ. හමුදාව සඳහාම “දකුණු නැංගුරමක්” ලෙස ක්‍රියා කිරීමට නියමිත අතර, ප්‍රහාරක ජෙට් යානා, ප්‍රහාරක සබ්මැරීන සහ යුධ නැව් ඇතුළුව ඉහළම එක්සත් ජනපද ප්‍රහාරක වත්කම් සමූහයක් මෙම දූපත් මහාද්වීපය තුල ස්ථානගත කිරීමට නියමිතය. මෙම ස්ථානගත කිරීම් බොහෝ චීන මිසයිල පරාසය ඉක්මවයි.

ඩීඑස්ආර් විශාල මිලිටරි තරකිරීමක් ඉල්ලා සිටිනවා පමණක් නොවේ.  එය අවම වශයෙන් 1970 ගණන්වල සහ 1980 ගණන්වල සිට ඕස්ට්‍රේලියානු ආරක්ෂක ප්‍රතිපත්ති නාමිකව පාලනය කර ඇති මූලධර්ම අවලංගු කරයි.

ඔස්ට්‍රේලියාව, අධිරාජ්‍යවාදී බලවතෙකු ලෙස, විශේෂයෙන්ම දකුණු පැසිෆික් කලාපයේ, එහි කොල්ලකාරී අවශ්‍යතා අඛණ්ඩව ඉදිරියට ගෙන ගොස් ඇත.  ඉරාකයේ සමාජ ඝාතන ආක්‍රමණය සහ ඇෆ්ගනිස්ථානය වසර විස්සක දිගු වාඩිලෑම ඇතුලුව, එක්සත් ජනපදය විසින් මෙහෙයවනු ලබන සෑම සාපරාධී යුද්ධයකටම එය සම්බන්ධ වී ඇත.

එහෙත් එහි මුඛ්‍ය මිලිටරි ප්‍රතිපත්තිය, අවම වශයෙන් කඩදාසි මත ලියවුනු දේ ⁣හැටියට, සාපේක්ෂ වශයෙන් හුදකලා වූ ඕස්ට්‍රේලියානු මහාද්වීපයේ ආරක්ෂාව තහවරු කිරීම  සහ ඊට ආසන්නම ප්‍රදේශයේ පහළ මට්ටමේ ගැටුම්  සඳහා ප්‍රවේශයන් සහ සූදානම් වීමක් විය.  තවදුරටත් එය එසේ වන්නේ නැත.  ඩීඑස්ආර් ප්‍රකාශ කරන්නේ, දැන “ඉලක්ක අපේ දේශසීමාවෙන් ඔබ්බට” පවතින නිසා මිලිටරිය සමස්ත ඉන්දු-පැසිෆික් කලාපය පුරා “බලපෑම්කාරී ප්‍රක්ෂේපණයට” යෙදවිය යුතු අතර වඩාත් පුලුල් ලෙස යෙදිය යුතු බවයි.

DSR තවත් නව මූලධර්මයක් හඳුන්වා දෙයි.  පිටු 110ක ලේඛනයක 37 වතාවක් පුනරුච්චාරණය කරන ලද වාක්‍ය ඛණ්ඩවල, මිලිටරි ප්‍රයත්නය “සම්පූර්ණ රජයේ” සහ “මුළු ජාතියේ” ප්‍රයත්නයක් විය යුතු බව ප්‍රකාශ කරයි.  මේ සඳහා “ජාතික සමගිය සහ සහජීවනය” අවශ්‍ය බව ලේඛනය ප්‍රකාශ කරයි.

මෙය පාසල් හා විශ්ව විද්‍යාලවල සිට ආර්ථිකය සහ සියලු සේවා ස්ථාන දක්වා සමාජයේ සෑම අංශයක්ම “ජාතික ආරක්ෂාවට” සහ යුද ප්‍රයත්නයට යටත් කළ යුතු බවට කරන ප්‍රකාශයකට වඩා අඩු දෙයක් නොවේ.

නාමිකව ප්‍රජාතන්ත්‍රවාදී ලෙස හද්‍රන්වන ආයතනවලට ඉහලින් මිලිටරිය තබන අතර සම්බන්ධතාවය ප්‍රතිලෝම කරමින් මිලිටරිය කෙරෙහි සිවිල් අධීක්‍ෂණය සහ පාලනය එය ප්‍රශ්න කරයි.  එය “ජාතික සමගියට” වල කැපීමක් ලෙස සැලකිය හැකි කම්කරුවන්ගේ වැඩ වර්ජන සහ අනෙකුත් විරෝධතා ක්‍රියා නීති විරෝධී කිරීම ඇතුළු පොලිස්-රාජ්‍ය ක්‍රියාමාර්ග සඳහා රාමුව ද සපයයි.

මෙම විශාල වෙනස්කම් යුක්ති සහගත කිරීම සඳහා, සමාලෝචනය පුනරුච්චාරණය කරන්නේ, චීනය පශ්චාත් දෙවන ලෝක යුද්ධයේ විශාලතම මිලිටරි ගොඩ නැගීම සිදු කරමින් සිටින බවත්, එය කලාපය පුරා “ආර්ථික බලහත්කාරයන්” සහ ආක්‍රමණශීලී මෙහෙයුම්වල යෙදී සිටින බවත් යන වොෂින්ටනයේ ව්‍යාජ ප්‍රකාශයන් ය.

මේ සියල්ල හුදෙක් ප්‍රක්ෂේපණය වේ.  එක්සත් ජනපදය ඉන්දු-පැසිෆික් කලාපයේ සහ ඕස්ට්‍රේලියාවේ ම ඇතුළුව මිලිටරි කඳවුරු මගින් ලෝකය වට කර ඇත.  2011 දී ඔස්ට්‍රේලියානු පාර්ලිමේන්තුවේ සිට ඔබාමා පාලනාධිකාරය එහි “ආසියාවට හැරීම” ප්‍රකාශ කිරීමෙන් පසු පෙන්ටගනය ඉන්දු-පැසිෆික් කලාපයේ දැවැන්ත මිලිටරි ව්‍යාප්තියක් සිදු කර ඇත.

DSR හි දක්වා ඇති සෑම මිලිටරි වත්කමක්ම ආක්‍රමණශීලී ස්වභාවයක් ගනී.  ඕස්ට්‍රේලියාව විසින් අත්පත් කර ගැනීමට නියමිත න්‍යෂ්ටික බලයෙන් ක්‍රියාත්මක වන සබ්මැරීන සමූහය ඊට ඇතුළත් වන අතර ඒවා “මුහුදේ ප්‍රභලම විලෝපිකයා” ලෙස නම් කර ඇත.  මීට හමුදාව සඳහා දිගු දුර ප්‍රහාරක මිසයිල, නම් නොකළ සන්නද්ධ ඩ්‍රෝන යානා සමඟ නාවික හමුදාවට සහ ගුවන් හමුදාවට සපයන ප්‍රහාරක මිසයිල ද ඇතුලත් වේ.

මහාද්වීපයේ මුළු උතුරම තථ්‍ය හමුදා ස්ථානගත වන ප්‍රදේශයක්  බවට පරිවර්තනය වෙමින් පවතින අතර, මෙය විශාල නවතුම් ස්ථාන සහ ඉන්ධන සැපයීමේ සැලසුම් සහිතව එය චීනයේ ප්‍රධාන භූමියට එරෙහිව ද ඇතුළුව කලාපය පුරා ආක්‍රමණශීලී එක්සත් ජනපද සහ ඕස්ට්‍රේලියානු මෙහෙයුම් දියත් කිරීමේ ලක්ෂ්‍යයක් ලෙස සේවය කළ හැකි වන පරිදිය.

එක්සත් ජනපදයේ ජ්‍යෙෂ්ඨ පුද්ගලයන් විසින් පෙන්වා දී ඇති පරිදි යුද සැලසුම්වල සැබෑ අරමුන චීනයට එරෙහිව යුද්ධ කිරීමයි. මන්ද චීනයේ  ආර්ථික වර්ධනය ඇමරිකානු අධිරාජ්‍යවාදයේ ප්‍රමුඛත්වයට තර්ජනයක් වන බැවිනි.  රුසියාව හා චීනය සමග ගැටුම් දිගටම පෙන්නුම් කරන්නේ එය භූ-මූලෝපායික වශයෙන් තීරනාත්මක යුරේසියානු ගොඩබිම මත එක්සත් ජනපද ආධිපත්‍යය තහවුරු කර ගැනීම අරමුනු කරගත්, තනි ගැටුමක පෙරමුණු දෙකක් ලෙස ය.

සියලුම ප්‍රධාන බලවතුන් සම්බන්ධ වන යුද ධාවනය ධනේශ්වර ක්‍රමයේ බිඳ වැටීමෙන් පැන නගී.  මෙම ආන්ඩු සියල්ලම පුපුරන සුලු සමාජ ආතතීන් පිටතට හරවා යැවීමට උත්සාහ කරමින් සිටින අතර, තම ප්‍රතිවාදීන්ට එරෙහිව එල්ල කරන ආක්‍රමණශීලී මිලිටරි ක්‍රියාමාර්ග හරහා තමන්ගේ අර්බුදය සමනය කර ගැනීමට යයි.

අධිරාජ්‍යවාදීන් යුද්ධයට පොලඹවන එම ක්‍රියාවලීන්ම කම්කරු පන්තියේ පුපුරන සුලු සමාජ අරගලවලට ආවේගය ලබා දෙයි.  දැනටමත්, සෑම මහාද්වීපයකම පාහේ බලගතු වැඩ වර්ජන සහ විරෝධතා සිදුවෙමින් පවතින අතර පන්ති අරගලයේ ප්‍රධාන වර්ධනයක් සිදුවෙමින් පවතී.  මෙම අරගල පුපුරා යන්නේ, ඉහල යන උද්ධමනය සහ දැවැන්ත මිලිටරි ගොඩ නැගීම සඳහා වැඩකරන පන්තිය විසින් ගෙවීමට සැලැස්වීම අරමුනු කරගත් කප්පාදු පිලිවෙත් ඇතුලු, යුද්ධයේ ප්‍රතිවිපාක වලට එරෙහිව ය.

යුද්ධය අවසන් කළ හැක්කේ ධනවාදය සහ එහි යල්පැනගිය ජාතික රාජ්‍ය පද්ධතිය අහෝසි කිරීමෙන් පමනි.  එනම්, සමාජ සමානාත්මතාවය, ප්‍රජාතන්ත්‍රවාදී අයිතීන් සහ සාමය සඳහා වන පොදු අරගලයක් තුල ලොව පුරා ශ්‍රමිකයන් එක්සත් කරමින් ජාත්‍යන්තර වැඩකරන පන්තියේ සමාජවාදී ව්‍යාපාරයක් සඳහා වන අරගලයයි.

මෙම ඉදිරිදර්ශනය 2023 මැයි දිනය සැමරීම සඳහා වන ගෝලීය ඔන්ලයින් රැලියේදී ගෙනහැර දක්වනු ඇත. [අවධාරනයන් සංස්කාරක ගෙනි]

#theSocialistLK #WSWS 

කොලඹ ක්‍රියාකාරී කමිටුව

මෙම මැයි දිනය ලොව පුරා කම්කරු පන්තිය විසින් සමරනු ලබන්නේ ඉස්මතු වෙමින් පවත්නා 3 වන ලෝක යුද්ධයේ ඉමහත් අනතුර හා ලොව පුරා ධනේශ්වර පාලනය විසින් පනවනු ලැබ ඇති ඝෝර ජීවන කොන්දේසිවලට එරෙහිව සටන් වදිමින් සිටින කම්කරු පන්තියේ ප්‍රතිප්‍රහාරය මධ්‍යයේ ය.

තමා විසින් ම නිර්මිත ලෝක පර්යායේ ප්‍රතිවිරෝධයන් සමඟ මේ මොහොතේ පොර බදමින් සිටින සුපිරි ධනපතීන්ගෙන් සමන්විත ප්‍රභූව, ධනේශ්වර ක්‍රමය විසින් නිර්මානය කෙරුනු සියල්ල ද ඇතුලත් සමස්ත පෘථිවියේ අත්‍යන්ත විනාශය සූදානම් කරමින් සිටිති. 

ඔවුන්ට ඒ සම්බන්ධයෙන් තෝරා ගැනීමක් ඉතිරි ව නැත. එක්සත් ජනපද අධිරාජ්‍යවාදය පසුගිය දශක තුන ගත කර ඇත්තේ, එහි එක් දිනක් හෝ නොහැර අඛන්ඩව ඒ හෝ මේ යුද්ධයේ පැටලී සිටිමිනි. බෝල්කන් අර්ධ ද්වීපයේ වේවා, ඉරාකයේ වේවා, ඇෆ්ගනිස්ථානයේ හෝ සිරියාවේ වේවා, මේ සෑම තැනෙක දී ම, අහිංසක සිවිල් වැසියන් මරා දැමීමට ඔවුන්ට තමන්ගේ ම හේතු තිබූ අතර, ඒ සම්බන්ධයෙන් තමන් ම නිර්මානය කරගත්, එහෙත් වසර ගනන් ගත වෙත් දී ඒවා පවත්වා

ගෙන යාමේ උනන්දුවක් තමන්ට හෝ නොතිබූ ව්‍යාජ යුක්තියුක්ත කිරීම් ද ඔවුන් සතු ව තිබින. රුසියාවට එරෙහිව යුක්‍රේනය තුල බලල් අත් යොදා ගනිමින් දියත් කර ඇති නැටෝ යුද්ධය න්‍යෂ්ටික ගැටුමක හා සමූල විනාශයක තර්ජනය මතු කරයි. චීනයට එරෙහි එක්සත්
ජනපද ප්‍රකෝපකරනයන් මෑතක දී උත්සන්න කර ඇති අතර, චීනය සමඟ යුද ගැටුමක් නොවැලැක්විය
හැකියැයි එජ ජ්‍යෙෂ්ඨ හමුදා නිලධාරීහු විවෘතව ම නිවේදනය කරති.      

නාසිවාදය පරාජයෙන් ශතවර්ෂ තුන් කාලක් ගෙවී යාමෙන් පසු නැවතත් යුරෝපය, ඇමරිකාව, හා ලෝක ගෝලයේ බොහෝ ප්‍රදේශවලින් නැවත සිය විරූපී හිස ඔසවමින් සිටින ෆැසිස්ට්වාදය සමඟ කම්කරු පන්තිය මුහුනට මුහුන දී සිටී. තම ෆැසිස්ට්වාදී විභවය පිලිබඳ ව සමාජයේ
වඩාත්ම අන්ත-දක්ෂිනාංශික ස්වෝත්තමවාදී කොටස්වලට ඒත්තු ගැන්වීමේ තරඟයක ප්‍රධාන ධනපති පක්ෂ නිමග්න වී සිටී. ප්‍රජාතන්ත්‍රවාදී අයිතීන් මැඩ පැවැත්වෙමින් පවතින අතර, ‘ප්‍රජාතන්ත්‍රවාදයේ ආරක්ෂකයන්’ ලෙස පෙනී සිටින්නෝ එකී අයිතීන්
සම්බන්ධයෙන් කෙරෙන අත්‍යන්ත උල්ලංඝනයන් විවෘතව ම ආරක්ෂා කරමින් සිටිති.

ජාත්‍යන්තර කම්කරු පන්තිය මේ මොහොතේ පොර බදමින් සිටින්නේ, අද වනවිට ජීවිත මිලියන 21 ක් ඉක්මවා විනාශ කර ඇති කොවිඩ්-19 වසංගතයේ තුවාල තවමත් ලේ ගලමින් තිබෙන අතරතුර ම, ඒ මතට පැටවෙන කප්පාදු පියවරයන්හි ඝෝර ප්‍රතිවිපාක සමඟ ය. ධනේශ්වර ආන්ඩු, සුපිරි ධනපති ප්‍රභූවට අයත් මිනිසුන්ගේ තුනී සමාජ ස්ථරයක ලාභය සහ ඓශ්චර්යය වෙනුවෙන්, වසංගතය
පිලිබඳ ව අපරාධකාරී නොතැකීමක් පවත්වා ගෙන යමින් මෙම දැවැන්ත ජීවිත විනාශයට කැමැත්තෙන් ම ඉඩ දී සිටියෝ ය. මෙකී ම්ලේච්ඡ ආකල්පය හුදු කොවිඩ් 19 වසංගතයට සීමා වූවක් නොව, දුගීන්ගේ ජීවිත පිලිබඳව – සහ යුද්ධය පිලිබඳව – ඔවුන් දරන පොදු ආකල්පයයි. 

ශ්‍රී ලංකාව තුල ඇතැම් බරපතල රෝගාබාධ සඳහා ප්‍රතිකාර කිරීමට යොදා ගැනෙන අත්‍යවශ්‍ය ඖෂධවල බැරෑරුම් හිඟයක් පවතින බව දැන් පොදුවේ දන්නා කරුනකි. මෙය හුදෙක් ශ්‍රී ලංකාවට හෝ ඊනියා ‘දියුනු වෙමින් පවතින’ රටවලට සීමා වූ තත්ත්වයක් නොවේ. ලෝකයේ වඩාත්ම බලගතු රටවල ජනයා පවා මුහුන දී සිටින්නේ එකී ඉරනමට ම ය. (ලෝක සමාජවාදී වෙබ් අඩවියේ ඉංග්‍රීසි පිටුවේ 2023 අප්‍රේල් 26
වාර්තාවකට අනුව)  ඇලබාමා සරසවියේ අනුක මූර්තන හා චිකිත්සක අංශයේ අධ්‍යක්ෂ ජොනතන් මැකිනති සඳහන් කරන අන්දමට, “එක්සත් ජනපදයේ පවා ජනයා, මෙම” ඖෂධ “හිඟකමින් මිය යාමට නියමිත බව නිසැක” ය.

අධිරාජ්‍යවාදය ව්‍යසනකාරී න්‍යෂ්ටික යුද්ධයක් දෙසට ගමන් කරමින් හා ප්‍රජාතන්ත්‍රවාදී අයිතීන් මර්දනය කරමින් සිටින
අතරතුර, ජාත්‍යන්තර කම්කරු පන්තිය ඊට ප්‍රතික්‍රියා දැක්වීමේ දිශාවට අනවරත ලෙස ගමන් කරමින් සිටී. ලෝක සමාජවාදී වෙබ් අඩවියේ ජාත්‍යන්තර කර්තෘ මන්ඩලයේ සභාපති ඩේවිඩ් නෝර්ත් මේ තතු විචිත්‍ර ආකාරයෙන් විස්තර කර ඇති ආකාරය
පහත උපුටා දක්වමු:

 “ඉහත දශකය තුල පැවතියේ පන්ති අරගලයේ අනවරත උත්සන්න වීමකි. පන්ති අරගලයේ එක් කැපී පෙනෙන සුලු ලක්ෂනයක් වූයේ එහි ජාත්‍යන්තර ස්වභාවයයි. සන්නිවේදන තාක්ෂනයේ විප්ලවකාරී වර්ධනයන් විසින් විවිධ රටවල කම්කරුවන් අතර පැවැති බාධක දියකර හැරෙමින් පවතී. ඕනෑම එක් සුවිශේෂී රටක ඇති වන සමාජ ගැටුමක්, එය ආරම්භ වූයේ කොතැනක ද යන්න නොතකා, ක්ෂනිකව ම පාහේ ජාත්‍යන්තර ප්‍රේක්ෂක ජනයා දිනා ගනිමින් ලෝක සිදුවීමක් බවට එක පැහැර පත් වෙයි. චිරාත්කාලීන භාෂාමය බාධක පවා, ලේඛන හා භාෂිතයන් ඒවා ලියන ලද හා කථනය කරන ලද භාෂාව කුමක් වුව එය නොතකා ඒවා පරිවර්තන කිරීමට හා අනු පිටපත් කිරීමට සමත්
ක්‍රමලේඛයන් හරහා ලෝක ගෝලීය ප්‍රේක්ෂා ගෘහයකට පහසුවෙන් වටහා ගත හැකි පරිදි ජය ගනු ලැබේ.” (WSWS, 08 April 2023) 

මේ ආකාරයෙන් කම්කරු පන්තිය, ජාතික මායිම් ඉක්මවා යමින් පාලක පන්තියේ ප්‍රහාරයන්ට ප්‍රතිචාර දක්වමින් සිටිති. සන්නිවේදන තාක්ෂනයේ නව වර්ධනයන්ගෙන් සන්නද්ධව සිටින ඔවුහු ලෝක ගෝලීය ආර්ථිකයකින් හා ජාතික ආන්ඩුවලින් සමන්විත පවත්නා ලෝක පර්යායට අභියෝග කරමින් සිටිති. ලාභ ඉපැයීම මත පදනම් වූ ධනේශ්වර පර්යාය සහ අධිරාජ්‍යවාදය, ජනයා සිය ජාතිය, වර්ගය, ආගම
හා සමේ වර්නය මත බෙදා වෙන් කරමින්, තාක්ෂනයේ, විද්‍යාවේ, සංස්කෘතියේ, සහ මානව වර්ධනයේ කවර හෝ සංවර්ධනයක් ඇති වීමට එරෙහිව විවෘතව ම බාධක පනවමින් සිටිති. ධනපති පන්තියට හා, එකී පන්තිය කම්කරුවන් සඳහා සූදානම් කරමින් සිටින කුරිරු ප්‍රහාර සම්බන්ධයෙන් කම්කරුවන් නොමඟ යවමින් ඔවුන් අතර පන්ති සහයෝගීතාවයේ දේශපාලනය ප්‍රවර්ධනය කරන සියලු ධනපති ඒජන්තයන්ට එරෙහිව අත්‍යවශ්‍ය හා මඟ හැර යා නොහැකි අවශ්‍යතාවය ව පවතින්නේ කම්කරුවන්ගේ සංවිධානාත්මක උපකරනය නිමවාගැනීමයි.     

හාමත, මරනය සහ විනාශය රැගත් වර්තමානයේ දිග හැරෙමින් පවතින සමාජ අර්බුදයට තමාගේ ම විසඳුම පිලිබඳ ව සාකච්ඡා කරමින්, විවාද කරමින් හා සටන් වදිමින්, සුපිරි ධනපතීන්ගේ හා මූල්‍ය කතිපයාධිපත්‍යයේ ලෝක පර්යාය වන අධිරාජ්‍යවාදයේ කුරිරු ප්‍රහාරවලට ප්‍රතිප්‍රහාර දීමට තමන්ගේ ම ස්වාධීන ක්‍රියාකාරී කමිටු (සාමාන්‍ය කම්කරුවන්ගේ කමිටු) ආකාරයෙන් ස්වකීය සංවිධාන පිහිටුවා ගන්නා ලෙස කොලඹ ක්‍රියාකාරී කමිටුව මුලු රට පුරාත්, ලෝක ගෝලය පුරාත් සියලු කම්කරුවන්ට කැඳවුම් කරයි.  

2023 මැයි දිනය සමරමින්, ධනේශ්වර ප්‍රහාරවලට මෙන්ම ලෝක යුද්ධයක් කරා කෙරෙන ප්‍රයානයට ද එරෙහිව ස්වකීය ප්‍රතිප්‍රහාරයේ ක්රියාකාරකම් හා වැඩ පිලිවෙල පිලිබඳ ව සාකච්ඡා කිරීමට තමන්ගේ ස්වාධීන ක්‍රියාකාරී කමිටු, කම්හල් හා නිවහන් ප්‍රදේශ කමිටු ගොඩ නැඟීමටත්, එකී ප්‍රහාරවලට එරෙහිව කම්කරු ක්‍රියාකාරී කමිටුවල ජාත්‍යන්තර සන්ධානය (IWA-RFC) ගොඩ නැඟීම සඳහා සිය ජාත්‍යන්තර සහෝදරයන් සමඟ එක්සත් වීමටත් නැඟී සිටින ලෙස කොලඹ ක්‍රියාකාරී කමිටුව ශ්‍රී ලංකාව තුල හා සමස්ත ලෝකය පුරා සියලු පන්ති සහෝදරයන් හා සහෝදරියන්ට කැඳවුම් කරයි.    

එවැනි සන්ධානයක් සඳහා ලෝක සමාජවාදී වෙබ් අඩවිය හා හතරවැනි ජාත්‍යන්තරයේ ජාත්‍යන්තර කමිටුව දැනටමත් කර ඇති කැඳවීමට පූර්න සහයෝගය පල කරන අපි, කම්කරුවන්ගේ හා ග්‍රාමීය දුගී ජනයාගේ ප්‍රජාතන්ත්‍රවාදී හා සමාජවාදී සම්මේලනයක් කැඳවීමෙහි ලා එක්සත් හා පොදු ක්‍රියාමාර්ග ගැනීමට හජාජාකයේ ශ්‍රී ලංකා ශාඛාව වන සමාජවාදී සමානතා පක්ෂයට (සසප) අප ඉදිරිපත් කර ඇති ඉල්ලීම සම්බන්ධයෙන් ප්‍රතිචාර දක්වන්නැයි එම පක්ෂයෙන් ඉල්ලා සිටිමු.

අධිරාජ්‍යවාදී යුද ප්‍රයත්න භංග වේවා!

ලෝකයේ කම්කරුවනි,
එක්වව්!!

ඡායාරූප අනුග්‍රහය ලෝසවෙඅ    

#CACPS #theSocialistLK  

නන්දන නන්නෙත්ති විසිනි

ප්‍රතිපත්ති හා මූලධර්ම ආරක්ෂා කිරීමේ දී ඉන්ද්‍රකීලයක් වන් කම්කරුවෙක්, මනස්කාන්ත මිනිසෙක්, අව්‍යාජ විප්ලවවාදියෙක්,ආදරවන්තයෙක්, ලෙන්ගතු මිත්‍රයෙක්, යන සෑම භූමිකාවකම තමන් දන්නා කියන හැමගේ හද දිනූ අමරතුංග සහෝදරයා නව පරම්පරාවන්ට ජිවිතය කියා දීම සදහා වටිනා මොඩලයකි යි අපට සිතේ.

අමරතුංග සහෝදරයාගේ ජීවිතය හා ආත්මය සමාජවදය පිලිබද ඔහුගේ අවබෝධය සහ වගකීමේ ස්වභාවය ගැන වැටහීමකින් තොර ව පරිපූර්න ලෙස දැනගනු නො හැකි ය. 1990 අවුරුද්දේ සිට මේ දක්වාත් හෘද රෝගියකුව ප්‍රතිකාර ගන්නා ඔහු තම වෛද්‍යවරයාගේ ප්‍රශ්නයකට දුන් පිලිතුර ඊට එක් නිදසුනකි.

වි‌ශේෂඥ වෛද්‍ය මදුරාවේ වරක් ඔහුගෙන් අසයි. “ඔබ මෙහි පැමිනි කාලයේ ම ප්‍රතිකාර ගනීමට පැමිනි අය අතරින් කී දෙනෙක් දැන් මේ පෝලිමේ සිටී ද?”

“එක්කෙනෙක්වත් නැහැ” අමරතුගගේ පිලිතුරයි. 

” ඒ ඇයි?” වෛද්‍යවරයා අසන්නේ ය.

“මම සමාජවාදියෙක්. මට ඉදිරි දර්ශනයක් තියෙනවා.” අමරතුංග පවසන්නේ සෙසු රෝගීන් මෙන් නොව තමන් අනාගතය වෙනුවෙන් දැනුවත්ව ජීවත් වන නිසා අසීරු තත්වයන් ජය ගැනීමේ අන් රෝගීන්ට නැති හැකියාවක් තමන්ට ඇති බව ය.  

සැතපුම් ගනන් දුර ඇවිදිමින් අප සමග හරි හරියට දේශපාලන වැඩවල යෙදුන අමරතුංග පසු බැස්සවීමට තරම් රෝගය සමත් නො වීය. වැඩිම වුනොත් “පොඩ්ඩක් ඉන්න සහෝදරයා” කියා පෙත්ත දිව යට තබාගෙන ටික වෙලාවක් මදවේගී වීම හැර බාධාවක් ඔහුට නො වී ය.

මෙම ක්ෂ්මා විරහිත පන්ති සටන්කරුවා 1943 අප්‍රේල් 26දා හික්කඩුවේ දී උපත ලැබී ය. තොටගමුව විජයබා විද්‍යාලයේ 6 වන පන්තිය දක්වා පමනක් උගත් ඔහු  17 විය සම්පූර්න වීමටත් පෙර, එනම් 1959 දී බෝගලට ගොස් පතල් කම්කරුවෙකු ලෙස ජීවනෝපාය ද, ජීවිත අධ්‍යනය ද ආරම්භ කලේ ය. පසුව තමන් සරන පාවා ගත් ඉතා ආදරනීය බිරිද දයා සහෝදරිය සමග එක්ව පුතුන් 4 දෙනෙකු හදා වඩා ගත්තේ ය.

කතෝනිස් බාස් නම් පුද්ගලයෙකු විසින් අත්පත් කර ගත් බෝගල මිනිරන් කැනීම 1887 න් පසු කැපී පෙනෙන ධනපති කර්මාන්තයක් ලෙස ඔසවන්නේ කතෝනිස්ගේ උගත් දරුවන්ගේ මෙහෙයවීම යටතේ ය. පීඩිත කම්කරුවන්ගේ ජීවිතය උරා බී වැඩුනු කර්මාන්තය සදහා මේ පතල මුහුදු මට්ටමට ද වඩා ගැඹුරට ඛනින ලදී. එහි සම්පූර්න ගැඹුර මීටර් 275කි. අමරතුංග ජීවිතයේ ගැඹුර ක්‍රමානුකූලව සොයා ගනිමින් සිටියේ ය.

1972 දී එවක පැවති ලංකා සමසමාජ පක්ෂය (ලසසප), කොමියුනිසට් පක්ෂය (කොප) සහභාගී වූ සිරිමා බන්ඩාරනායකගේ සමගි පෙරමුනු ආන්ඩුව බෝගල පතල ද ධනපතියන්ට වන්දි ගෙවා ‘ජනසතු’ කලේ ය. ඉහත නම් සදහන් පක්ෂ දෙක ම මේ ‘ජනසතුව’ හැදින් වූයේ ධනපති විරෝධී හා සමාජවාදය කරා ප්‍රගතිශීලි ධනපතියන් ය යි ඔවුන් විසින් හැදින් වූ ධනපතියන් සමග එක්ව පියවර තැබීමක් ලෙස ය.

එවක අමරතුංග ඇතුලු බෝගල පතල් කම්කරුවෝ සමසමාජ පක්ෂයට අයත් වෘත්තීය සමිතියේ සාමාජිකයෝ වූහ. ජනසතුවෙන් දෙවසරක් ගිය තැන 1974 වසරේ පරිපාලනය හා වෘත්තීය සමිති නායකත්වය අමරතුංග සහෝදරයාගේ රැකියාව අහිමි කලහ. සමිති නායකයෝ හාම්පුතුන් සමග එක්ව සාද පැවැත්වීම ඔහු විසින් ප්‍රශ්න කරනු ලැබීම ඊට තුඩු දුන් හේතුවයි. එවකට අපගේ සහෝදරයා මුරකරුවෙකු ලෙස රැකියාව කරමින් සිටි අතර කුමන්ත්‍රනකරුවෝ ඔහුගේ ආරක්ෂාව යටතේ තිබූ  උපකරනයක් අතුරදහන් කර ඒ අනුව ඔහු රැකියාවෙන් නෙරපූහ. වෘත්තීය සමිති නායකයෝ, තමන් මෙම කුමන්ත්‍රනයේ හවුල්කරුවන් නො වන සේ පෙනී සිටි නමුත්, පැමිනිල්ලක් දැමීමට නියමිත කාලයට එක් දිනක් පසුවන තෙක් බලා සිට කම්කරු උසාවියට පැමිනිලි කිරීම මගින් නීතිමය රැකවරන සදහා උත්සාහ කිරීමට ඇති අවස්ථාවද ඔහුට අහිමි කලහ.   

අමරතුංග සිය දරු පවුල සමග පෙරලා හික්කඩුවට පැමින කුලී වැඩ කරමින් ජීවිතයට මුහුන දුනි. 1976 රංගල්ල පාලම අසල කරදිය බාධක වේලි බැදීමට සහභාගී වූ කම්කරුවෙකු ලෙස සේවය කරමින් සිටි ඔහු විප්ලවවාදී කොමියුනිස්ට් සංගමයට මුන ගැසේ. සාකච්ඡා වට කිහිපයකින් පසු පක්ෂයේ සාමාජිකයෙකු ලෙස ආරම්භ කල ඔහුගේ අකලංක විප්ලවවාදී දේශපාලන ජීවිතය නො මැකෙන සටහන් තැබූ එකකි. 

මෙම කම්කරුවා බදවා ගැනීමේ සාකචඡා කීපයක් සිදු කිරීමට එවක පක්ෂයේ නව යව්වන සාමාජිකයෙකුව සිටි මෙම ලිපියේ ලේඛකයාට ද අවස්ථාව ලැබුනේ ය යන්න ඉමහත් සන්තුෂ්ඨියකි. එතැන් සිට අමරතුංග, දැන් සමාජවාදී සමානතා පක්ෂයේ මධ්‍යම කාරක සභිකයෙක් වන රත්නසිරි මලලගම විසින් කුමන්ත්‍රනකාරී ලෙස පක්ෂයෙන් ඉවත් කිරීම සඳහා කටයුතු සැලසුම් කරනු ලබන තෙක් කිසිදු බාධාවකින් නො සෙල්වී පක්ෂයත් එහි ඉදිරි දර්ශනයත් ආරක්ෂා කරමින් සටන් වැදුනේ ය. 

අමරතුංග පක්ෂයට බැදීම ජාත්‍යතර කම්කරු පන්තිය තලා දැමීම සදහා ක්‍රියාත්මක වූ දක්ෂිනංශික ව්‍යාපරයට එරෙහිව සිදු වූවකි. 1971 බ්‍රෙටන්වුඩ් සම්මුතිය බිද දමමින් ප්‍රකාශයට පත් ලෝක ධනේශ්වර අර්බුදය පන්ති අරගලය උත්සන්න කලේ ය. වෘත්තිය සමිති හා කම්කරු පන්තියේ නමින් පෙනී සිටි පක්ෂවල පාවාදීම මත හිස එසවූ පාලක පන්තිය කම්කරු පන්තියට එරෙහි සම්ම්මුති විරහි ප්‍රහාරයක් දියත් කලේ ය. බ්‍රිතාන්‍යයේ මාග්‍රට් තැචර්ගේ සිට මෙරට ජේ. ආර් ජයවර්ධන දක්වා අන්ත දක්ෂිනංශික ආන්ඩු සම්පූර්න යටත් වීම කම්කරු පන්තයෙන් ලබා ගැනීමට වැඩ ආරම්භ කලේ ය.  අමරතුංග කම්කරු පන්ති ජාත්‍යන්තරවාදය පිලිගනිමින් ඒ වෙනුවෙන් ජීවිතයම කැප කිරීම තෝරා  ගන්නේ මෙවන් පසුබිමක ය.

මෙම කම්කරුවා, සමසමාජකාරයන්ගේ කුමන්ත්‍රනයට ගොදුරු වූවා සේම සමසමාජයේ මහා පාවා දීමට එරෙහිව සටනක් කොට ගොඩ නැගූ  සමාජවාදී සමානතා පක්ෂය (එකල විකොස) තුල වැඩී ඇති, මුලධර්ම විරෝධී, අවස්ථාවාදී උමතු කල්ලියේ ගොදුරක් වීම නාටකාකාර දේශපාලන ප්‍රකාශනයකි.

මීට වසර කිහිපයකට පෙර හික්කඩුව කලුපෙ ගම්මානයේ ලදරු පාසැලක පැවැත් වූ උත්සවයක පොල් තෙල් පහන දැල්වීමට අමරතුංගට ආරාධනා කරන ලදී. ගම්වැසියන් ඒ තරමටම මේ කම්කරුවාට ගරු කලේ ය, ආදරය කලේ ය, අවංක නායකයෙකු ලෙස පිලිගත්තේ ය. 

එහෙත් අමරතුංග ඉතා ලෙංගතුව ආරාධනය ප්‍රතික්ෂේප කලේ ය. එම විවෘත කිරිමට පාලක පක්ෂයේ අතුකොරාල නමැත්තා ද සහභාගී විම නිසා ය, අමරතුංග දෙවරක් නො සිතා එය ප්‍රතික්ෂේප කලේ. ධනපති නියෝජතයන් සමග කම්කරු පන්තියට ගනුදෙනුවක් නැති බව ඔහු තම හිතවතුන්ට පෙන්වා දුන්නේ ය.

ප්‍රතිපත්ති සම්බන්ධ මේ දෘඩභාවය විප්ලවවිදියෙක් වුවත් කම්කරු පන්තිකයෙකු  ලෙස තමන් හරියට ම ස්ථානගත කරගැනීමට අසමත් ඹධ්‍යම පන්තිකයෙකුට නැත. විකොස මධ්‍යම කාරක සභිකයෙකුව සිටින ගමන් මහාචාර්ය සුචරිත ගම්ලත්, එවක 60,000ක් ගම්බද තරුනයන් ඝාතනය කල යුඑන්පී ආන්ඩුවේ ඇමතියෙකු සමග 1990 දී වේදිකාරූඩ විම නිදසුනක් ලෙස පෙන්වා දිය හැකි ය. 

අමරතුංග ආරාධනය ප්‍රතික්ෂේප කල දිනවලම මෙහි  සදහන් රත්නසිරි මලලගම, පක්ෂයේ මධ්‍යම කාරක සභිකයෙකු ලෙස සිටින ගමන්, සිය බිරිදගේ ලදරු පාසැලේ විවිධප්‍රසංගයේ දී ආරධනා කර ගෙන්වා ගත් අතුකෝරල නමැති, අමරතුංග විසින් ප්‍රතික්ෂේප කරන ලද, පොදු පෙරමුනේ මන්ත්‍රී සමග එකට සිට පහන් දැල්වීම් යනාදිය සිදු කලේ ය. අමරතුංග ඇතුලු සාමාජිකයන් ඊට විරුද්ධ වූ විට රත්නසිරි සොයා බැලුවේ කැමරා ශිල්පියා ‍”එඩිට්” නො කර වීඩියෝව පිට කිරීම ගැන මිස සිය දේශපාලන නිවටකම කුමකින් පැන නැංගේ ද යන්න නො වේ. 

විප්ලවවාදී පක්ෂය තුල මධ්‍යම පන්තික ප්‍රවනතා මතු වීම අරුමයක්වත් අසාමාන්‍ය දෙයක්වත් නො වේ. පක්ෂය ගොඩ නගන්නේ ප්‍රවනතා අතර දේශපාලන ගැටුම් තුලිනි. පක්ෂය පවතින මෙබදු ප්‍රවනතා හදුනා ගැනීමේ දී අමරතුංග සහෝදරයාගේ දේශපාලන ජීවිතයෙන් ගත හැකි පාඩම් බොහෝ ය. 

1988-89 විකොස සාමාජිකයින් තිදෙනෙක් ජවිපෙ ඝාතකයන් විසින් බිලි ගනු ලැබුනහ. මේ අතර කිහිප වතාවක් ම ඝාතකයෝ මෙම ලියුමකරුගේ නිවස ද වට කල හ. පැරනි සාමාජිකයෙකු වූ සෝමරත්න කොඩිකාර සහෝදරයාට ද මරන තර්ජන එල්ල වී තිබිනි. පක්ෂය ජවිපෙ ක්‍රියාව හෙලිදරව් කරමින් කම්කරු පන්ති පිලිවෙත පැහැදිලි කල ලිපියක් මහජනයා අතර බෙදා හැරීම සදහා අම්බලන්ගොඩට එවන ලදී. අම්බලන්ගොඩ ලෝකලෙයේ සාමාජික රත්නසිරි එදා අතුරුදන් වූ පසු නැවත දේශපාලනයට එන්නේ විජේවීර ඝාතනයෙන් පසුව ය. අමරතුංග මරනීය තර්ජනය මැද සිය පුතුන් පක්ෂයට බදවා ගැනීමට හා, එසේ නො හැකි නම්, පක්ෂයේ ආධාරකරුවන් බවට පත් කර ගැනීමට තමන් කල කටයුතු ඉස්මත්තට ගත් අතර එක් පුතෙකු පක්ෂයට බදවා ගත්තේ ය. අනතුරුව තාරක අමරතුංග නම් එම තරුනයා මරනයට කැප ව සිටි මෙම ලිපිකරුගේ ආරක්ෂාව ගැන ද දැනුවත් කර මා සමග දේශපාලන කටයුතුවල නිරත කලේ ය. ධනපති පන්තියට මෙන් ම කම්කරු පන්තියට ද බියපත්ව සැග වී සිටිය නො හැකි ය. 

මධ්‍යම පන්තියෙන් පක්ෂයට බැදෙන පුද්ගලයන් කම්කරු පන්තිය නැමති පාසැලේ වසර ගනනාවක් පුහුනු කිරීමෙන් පසු මිස මොන ම වගකිව යුතු කටයුත්තක්වත් නො පවරන ලෙස ට්‍රොට්ස්කි පවසා ඇති දෙය ගැන තව බොහෝ ආදර්ශයන් අමරතුංගගේ ජීවිතයෙන් උකහාගත හැකි ය.

එවක අපගේ කම්කරුවාගේ කුඩා නිවස සෑම ඉරිදාවක ම පක්ෂයේ කටයුතු වෙනුවෙන් ම වෙන් විය. මේ කම්කරුවා ඒ හැම සාකච්චා වාරයක දී ම 15කට 20කට ආහාර පාන සැපයී ය. ඔහුගේ ආදරනීය බිරිද හා දරුවන් සැලකුවේ එය තමන්ට ලැබුනු අගනා අවස්ථාවක් ලෙස ය.

අපගේ කම්කරුවා පක්ෂයට බැදෙන්නට පෙර තරමක් හිතුවක්කාරී හා දැඩි තීරන ගෙන තමන් නො රුස්නා දෙයට මුහුන දීමේ තත්වයක පසු වූ බව කියවේ. පක්ෂය තුල අමරතුංග අත්පත් කර ගත් දේ කෙතෙක් ද යත් මොහු සන්සුන් පුද්ගලයෙක් කර දීම ගැන තමන් පක්ෂයට නයගැති ය යි ඔහුගේ බිරිඳ දයා සහෝදරිය නිරන්තරයෙන් හා දැඩි තෘප්තිකරභාවයෙන් ප්‍රකාශ කරන්නී ය.

අමරතුංග සියලු අසීරුතා තිබිය දී සිය පුතුන් සිව් දෙනාට හැකි ඉහලම අධ්‍යාපනය ලබා දීමට අධිශ්ඨානවත් විය. 

අමරතුංග තම එක් අතක පවතින දුර්වලතාව නො තකා වොලි බෝල් ක්‍රීඩාවට යොමු ව සිටියේ ය. නාට්‍යය, ගීතය, චිත්‍රය සහ මූර්තිය වෙත ඔහුගේ යොමු වීම දියුනු සංස්කෘතික කම්කරුවා පිලිබද ලකුනකි. 80 වියැති නමුත් තවමත් තරුන සිතැති මේ කම්කරුවා පොල් කටු යොදාගෙන කරන කලාත්මක භාන්ඩ නිර්මානය කිරීමෙන් යම් ආදායමක් ද උපය යි. 

මාක්ස්වාදී ව්‍යාපාරය හැම විට ම මෙබදු පෙරටුගාමී කම්කරුවන් දිනා ගැනීම ඉලක්ක කර  ගනී. ඔවුන්ට මිලියන ගනන්වලට නායකත්වය දිය හැකි ය. 

අවාසනාවට දැන් සිදුව ඇත්තේ වෙන දෙයකි. 2022 ජුලු 7 දින සිට සමාජවාදී සමානතා පක්ෂයෙන් ඔහු දොට්ට දමනු ලැබ ඇත. මෙම ලිපිකරුට එය හොදටම දැනේ. සංජය ජයසේකර සහෝදරයා සහ මා පක්ෂයෙන් දොට්ට දැමීමේ මුග්ධ තීරනය අමරතුංග මහත් සේ කම්පාවට පත් කලේ ය. දැන් මේ පක්ෂයේ සිට පලක් නැතැයි කියමින් වුවත් ඔහු උත්සාහ කලේ පක්ෂය තුල රැදී සිටිමින් එය නිවැරදි කර ගැනීමට ය. අමරතුංග දොට්ට දැම්මේ හරියටම මේ උත්සාහය නිසා ය. මලලගමගේ මෙම කුමන්ත්‍රනය ප්‍රධාන ලෙකම් දීපාල් ජයසේකර ඇතුලු දේශපාලන කමිටුව අනුමත කර ඇත.

එහෙත් අමරතුංග සහෝදරයා 4 ජාත්‍යන්තරයේ ජාත්‍යන්තර කමිටුවේ සහ සමාජවාදී සමානතා පක්ෂයේ ‌‌එතිහාසික හා දේශපාලන පදනම් මත පිහිටාගෙන සිය ජීවිත කාලයම සටන් වදින බව ගැන අපට සැක නැත. ඔහු එදා මෙන් ම අදත් සියල්ලට ම පෙර පක්ෂය යන අදහස අත් නො හැර වැලද ගෙන සිටී. සහෝදරයා, නුඹට දීර්ඝායු!

#theSocialistLK